Myunxénda xitaygha qarshi namayish ötküzüldi

Ixtiyariy muxbirimiz ekrem
2019-02-06
Élxet
Pikir
Share
Print
"5-Féwral ghulja weqesi" ning 22 yilliqini xatirilesh munasiwiti bilen myunxén shehiride ötküzülgen namayishtin körünüsh. 2019-Yili 6-féwral, gérmaniye.
"5-Féwral ghulja weqesi" ning 22 yilliqini xatirilesh munasiwiti bilen myunxén shehiride ötküzülgen namayishtin körünüsh. 2019-Yili 6-féwral, gérmaniye.
RFA/Ekrem

Myunxéndiki xitay konsulxanisi aldida "5-Féwral ghulja weqesi" ning 22 yilliqini xatirilesh namayishi ötküzüldi.

6-Féwral chüshtin kéyin sa'et 15:00 da xitayning myunxéndiki konsulxanisi aldida namayish ötküzülüp, "5-Féwral ghulja weqesi" ning 22 yilliqi xatirilendi we xitayning jaza lagérlirigha qarshi sho'arlar towlandi.

D u q ning teshebbusi bilen "5-Féwral ghulja weqesi" ni xatirilesh pa'aliyetliri 2-féwraldin buyan dunyaning herqaysi elliridiki Uyghurlar merkezliship olturaqlashqan döletlerde oxshimighan shekillerde élip bérilmaqta idi. Bügün merkizi myunxén shehiridiki "Yawropa sherqiy türkistan birliki" ning uyushturushi bilen Uyghurlar we türk jama'itining ishtirakida yene bir qétim xitaygha qarshi namayish ötküzüldi.

D u q ning yawropagha mes'ul wekili, "Yawropa sherqiy türkistan birliki" ning re'isi esqerjan ependi namayish muqeddimiside nutuq sözlep, "5-Féwral ghulja weqesi" ning yüz bérish jeryani we xitayning nöwette Uyghur diyarida élip bériwatqan basturush siyasiti hemde jaza lagérliri toghrisida gérman jama'itige melumatlar teqdim qildi shundaqla ayrim ziyaritimizni qobul qilip öz pikrini sherhlidi.

Bu namayishqa awaz qoshqan d u q ning mu'awin re'isi perhat muhemmidi ependi neq meydanda ziyaritimizni qobul qilghanda "5-Féwral ghulja weqesi" ni xatirilesh pa'aliyetlirining muhajirettiki Uyghurlar arisida 22 yildin buyan dawam qilip kéliwatqanliqini we yene dawamlishidighanliqini tilgha aldi.

2-Féwraldin bashlap, merkizi gérmaniyening köln shehiride bolghan "Milliy görüsh" teshkilatining d u q bilen hemkarliship uyushturushi bilen yawropadiki 10 din artuq dölette xitayning jaza lagérlirigha qarshi namayishlar teshkillen'gen we hélimu dawam qilmaqta idi. Türk hem islam elliri xelqining Uyghurlar mesilisige ige chiqishqa tirishishi, xitayning jaza lagérlirigha qarshi otturigha chiqip ipade bildürüshi Uyghurlargha zor jasaretler bexsh etken. D u q rehberlirining bildürüshiche, yéqin kelgüside xitaygha qarshi pütün dunya miqyasida zor kötürülüshler barliqqa kélidiken.

D u q diniy ishlar komitétining mudiri, "Sherqiy türkistan ölimalar birliki" ning mu'awin re'isi turghunjan alawuden ependi namayish meydanida ziyaritimizni qobul qilip, özining qarashlirini bayan qilip ötti. Uning teminligen uchurlirigha asaslan'ghanda ereb islam elliridimu aldimizdiki aylarda xitaygha qarshi zor kölemlik namayishlar teshkillinidiken.

Qurultay rehberliridin igilishimizche, d u q ereb yérim arili, sherqiy-jenubiy asiya, ottura asiya we yawropa elliridiki türk, islam teshkilatlirini pa'al heriketke keltürüsh üchün küch chiqiriwatqan bolup, 2019-yili dunya miqyasida xitaygha qarshi pa'aliyetlerning kölimi hessilep zoriyidiken.

Toluq bet