Tokyodiki xitay elchixanisi aldida 5-iyulni xatirilesh namayishi boldi

Ixtiyariy muxbirimiz haji qutluq qadiri
2016-07-04
Share
yaponiye-5-iyul-namayish.jpg Tokyodiki xitay elchixanisi aldida ötküzülgen 5-iyul ürümchi weqesini xatirilesh namayishidin körünüsh. 2016-Yili 5-iyul, yaponiye.
RFA/Qutluq

3-Iyul yaponiye Uyghur birliki teshkilatining teshkillishi bilen tokyodiki xitay elchixanisi aldida 5-iyul weqesini xatirilesh yüzisidin namayish élip bérildi.

Qedirlik radiyo anglighuchilar, hazir anglawatqininglar tokyodiki xitay elchixanisi aldida 2009-yili ürümchide yüz bergen 5-iyul weqesini xatirilesh yüzisidin yaponiye Uyghur birliki teshkilati élip bériwatqan namayish bolup, namayish teshkilligüchilerdin doktor turmuhemmet hashim téléfon ziyaritimizni qobul qilip namayish heqqide qisqiche toxtaldi.

Namayishqa ishtirak qiliwatqan yaponiyelik Uyghur kishilik hoquq mesililirini qollighuchi takashi sato namayish heqqide toxtilip: “Bügün gerche namayishqa qatnashqan ezalirimizning sani cheklik bolsimu, biraq hemmimiz birdek jushqun rohimiz bilen xitay elchixanisi aldida ürümchi qirghinchiliqida ölüp ketkenlerni eslesh, türmilerge naheq qamalghanlarni qoyup bérishke xitay hökümitini dewet qilishtin ibaret xitay kompartiyisige bolghan naraziliqimizni ipadilep namayish élip bériwatimiz” dédi.

Namayishqa qatnishiwatqan date xanim yette yil ilgiri ürümchide yüz bergen 5-iyul weqesini eslesh meqsitide tokyodiki xitay elchixanisi aldida élip bériliwatqan namayishtin özining tolimu tesirlen'genlikini ipadilep: “Yette yil ilgiri özining heq‏-hoquqlirini qoghdash yolida namayishta ölüp ketkenlerni qayghu ichide eslesh bilen birge, ulargha bolghan hörmitimizni bildürüp qirghinchiliqning jawabkari xitay kompartiyisige bolghan nepritimizni bildürüwatimiz” dédi.

Yaponiye Uyghur birliki teshkilatining re'isi doktor turmuhemmet hashimning bildürüshiche, namayish jeryanida yene 5-iyul weqesi munasiwiti bilen töt türlük telep otturigha qoyulghan bir bayanatnamimu élan qilin'ghan.

Yaponiyede élip bériliwatqan teywen musteqilliq herikitini qollighuchilardin biri bolghan takidi ependi bügünki 5-iyul weqesini munasiwiti bilen élip bérilghan namayishqa özining qatnishish sewebi üstide toxtilip mundaq dédi: “Xitay bilen oxshash bir millettin bolghan teywenliklermu xitay kompartiyisining insan heqlirini depsende qilishidin ibaret bu xil siyasitini toluq chüshinip yetkenliki üchün uzundin biri öz aldigha musteqil dölet bolushni telep qilip kéliwatidu. 5-Iyul weqesi bolsa xitaydin til, din we medeniyet jehettin perqliq bolghan Uyghurlarning öz zéminlirigha özi ige bolushini telep qilip élip barghan erkinlik namayishidur. Men shu sewebtin Uyghurlarni qollash meqsitide namayishqa qatnashtim.”

Yaponiyediki Uyghur siyasiy aktipliridin gülistan ezizi namayishtin kéyin öz tesiratini bayan qilip 5-iyul weqesini xatirileshning muhimliqini bildürdi.

Igilishimizche, tokyodiki xitay elchixanisi aldida élip bérilghan namayish chüshtin kéyin sa'et töttin sa'et beshke qeder bir sa'et dawam qilghan.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet