Абдувәли аюп: "мән тутқунлуқтин қутулдум, әмма хәлқим әң моһтаҗ болуватқан иштин ваз кәчмидим" (10)

Мухбиримиз қутлан
2016-12-27
Share
abduweli-ayup-ailisi.jpg Абдувәли аюпниң аилиси. Америка.
RFA

Абдувәли аюп түрмидин қоюп берилгәндин кейин, удул юрти қәшқәргә қайтиду. Һалбуки, униң қәшқәрдә көргини униң тәсәввуридин аллиқачан һалқип кәткән, қорқунч вә вәһимигә толған бир дуня иди.

У юртидики сиясий вәзийәтниң илгирики вақитларға қариғанда һәссиләп яманлашқанлиқини, сақчи, кәнт кадири яки адәттики бир аманлиқ хадиминиң әрзимәс бир ишларни баһанә қилип һәрқандақ бир адәмни қамиветәләйдиғанлиқини өз көзи билән көриду.

Шундақ болушиға қаримай, у өз ғайисидин, ирадисидин вә қилмақчи болған ишлиридин ваз кәчмәйду. Һалбуки, униң һәр бир қетимлиқ тиришчанлиқи униңға ойлап бақмиған көңүлсиз ақивәтләрни елип келиду. Униң билән илгири һәмкарлашқан достлириниң һәммиси сиясий бесим түпәйли униңдин қачиду. Сақчи вә йәрлик һөкүмәт хадимлири һәр қәдәмдә униң йолини тосайду. Һәтта у өзи туғулуп өскән юрти қәшқәрдә өй иҗарә алалмай талада қалиду. Бу һал униңға юрти қәшқәрдә туруп бирәр ишни вуҗудқа чиқиришниң һечқандақ мумкинчилики қалмиғанлиқини, һәтта шәхсий һаяти вә мәвҗутлуқиниңму бир көрүнмәс тәһдитниң хириси ичидә турғанлиқини һес қилдуриду.

Қәшқәрдә туруп яшашқа һеч амали қалмиған абдувәли ахири йәнә бир қетим - әң ахирқи қетим - чәтәлгә чиқип кетишни синап бақмақчи болиду.

Униң илгирики паспорти бир мәһәл тартивелинған болсиму, лекин у тутқун қилинишниң алдида қайтуруп берилиду. Һалбуки, абдувәли бу паспорт билән әмдиликтә йәнә бир қетим чәтәлгә чиқип кетишниң мумкинчилики бар-йоқлуқини биләлмәйду.

У ахири синап көрүш үчүн қирғизистанға чиқмақчи болиду, һалбуки, униң йеқинлири електронлуқ виза елип түркийәгә синап көрүшни тәвсийә қилиду. Абдувәли аюп достлириниң мәслиһәти бойичә үрүмчи айродромиға тәвәккүл қилип кириду. Гәрчә хитай чегра хадимлири уни үрүмчи айродромида бир саәттәк аварә қилип тутуп қалған болсиму, ахири униң түркийәгә учидиған айропиланға чиқишиға йол қойиду.

Ойлимиған бу тәвәккүлчилик уни һөр дуняға елип келиду. Һалбуки, тутқун қилиниш, сорақ-соалға тартилиш, түрмә азаби вә униңға улишип кәлгән аччиқ кәчүрмишләр униң кейинки һаяти давамида өз тәсирини көрсәтмәй қалмайду.

Абдувәли аюп түркийәгә кәлгәндин кейинму хели узун мәзгилгичә,сақчини көрсә бәдини шүркинидиған, туюқсиз ишик чекилсә вәһимә ичидә қалидиған, чүшлиридә қорқунчлуқ мәнзириләрни көридиған психик җараһәт ичидә яшайду. Әмма у пурсәт туғулған һаман вәтәнгә қайтип өз хәлқи моһтаҗ болуватқан әң зөрүр ишлар билән шуғуллиниш ғайисидин һәргиз ваз кәчмәйду.

У истанбулниң сәфакөй районидики өйидә зияритимизни қобул қилғанда мундақ сөзләр билән өз һекайисини ахирлаштурди:
"мән тутқунлуқтин қутулуп һөр дуняға қайтип кәлдим, әмма хәлқим әң моһтаҗ болуватқан ана тилдики миллий маарип йолидин һәргизму ваз кәчмидим. Пурсәт туғулған һаман мән вәтәнгә қайтимән. Чүнки мән маңа муһәббәт, ишәнч вә ғурур бәргән ашу хәлқим билән җападиму, һалавәттиму биргә яшишим керәк!..."

(Давами бар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт