Türkiye pamuqqale uniwérsitétida "Asaret astidiki sherqiy türkistan" témisida doklat bérish yighini ötküzüldi

Ixtiyariy muxbirimiz erkin tarim
2018-05-01
Élxet
Pikir
Share
Print
Pamuqqale uniwérsitétida ötküzülgen "Asaret astidiki sherqiy türkistan" témisida doklat bérish yighinidin bir körünüsh. 2018-Yil 30-aprél. Dénizli, türkiye.
Pamuqqale uniwérsitétida ötküzülgen "Asaret astidiki sherqiy türkistan" témisida doklat bérish yighinidin bir körünüsh. 2018-Yil 30-aprél. Dénizli, türkiye.
RFA/Erkin Tarim

Nöwette Uyghur diyaridiki siyasiy weziyetning, bolupmu Uyghurlarning siyasiy, diniy, medeniyet we ijtima'iy-iqtisadiy hayatining teqiblesh astigha élinishi, zor sandiki Uyghurlarning "Yépiq terbiyilesh lagérliri" gha solan'ghanliqigha a'it xewerlerning köpiyishige egiship, türkiyening her qaysi uniwérsitétlirida Uyghurlar toghrisida doklat bérish yighinlirimu ötküzülmekte. 30-Aprél küni türkiyening dénizli shehiridiki pamuqqale uniwérsitétida "Asaret astidiki sherqiy türkistan" témisida doklat bérish yighini ötküzüldi. 3 Sa'et dawamlashqan doklat bérish yighinigha pamuqqale uniwérsitéti oqutquchi we oqughuchiliridin bolup 500 etrapida kishi ishtirak qildi. Yighinda enqerediki hajettepe uniwérsitéti tarix oqutquchisi doktor erkin ekrem ependi "Xitayning Uyghurlargha éghir bésim ishlitishidiki seweb néme?" témisida, sherqiy türkistan ma'arip we hemkarliq jem'iyitining yashlargha mes'ul rehbiri doktor abdusalam teklimakan ependi "Sherqiy türkistanning nöwettiki éghir weziyiti" témisida doklat berdi. Yighin bashlinishtin burun Uyghur diyari we Uyghurlar tonushturulghan körgezme échilghan bolup, körgezmide köprek Uyghurlarning hazirqi weziyiti eks ettürülgen resimler qoyulghan. Biz doklat bérish yighini axirlashqandin kéyin neq meydan'gha téléfon qilip munasiwetlik kishiler bilen söhbet élip barduq.

Yighinni uyushturghan pamuqqale uniwérsitéti oqughuchilar uyushmisi re'isi yaqup chaqir ependi doklat bérish yighinining yaxshi ötkenlikini, yighin échishtiki meqsitige yetkenlikini bayan qilip mundaq dédi: "Sherqiy türkistan bizning ata yurtimiz, qérindashlirimiz, dindashlirimiz yashawatqan bir zémin. U yerde meydan'gha kéliwatqanlargha qarap turalmaymiz. Pa'aliyitimizge köp kishi ishtirak qildi. Bek yaxshi ötti. Oqutquchi we oqughuchilar bu xil pa'aliyetlerni bundin kéyinmu ötküzüshimizni telep qildi." 

Doktor erkin ekrem ependi ziyaritimizni qobul qilip, mezkur doklat bérish yighinida sözligen öz doklatida asasliqi xitay hakimiyitining Uyghurlargha yürgüzüwatqan diniy, milliy we siyasiy bésimliri heqqide tepsiliy toxtalghanliqini körsetti.

Undaqta xitayning Uyghurlargha bundaq éghir bésim siyasiti élip bérishning sewebliri zadi néme? doktor erkin ekrem ependi xitayning siyasiy medeniyitide bashqa milletlerni yat körüsh, bashqa milletlerge ishenmesliktek köz qarashning mewjut ikenlikini, buningdin sirt yene "Sherqiy türkistanning istratégiyilik ehmiyitining intayin muhim ikenliki" ni, bundaq sewebler tüpeylidin Uyghurlargha bésim ishlitiliwatqanliqini otturigha qoyghan.

Doktor erkin ekrem ependi oqughuchilarning qiziqip so'allarni sorighanliqini, bezi oqughuchilarning 21-esirdimu mushundaq bésim bolamdu? dep so'allarni sorighanliqini bayan qildi. 
Öz doklatlirida we ijtima'iy taratqularda nuqtiliq halda Uyghur yashlirining mesililirini otturigha qoyuwatqan doktor abdusalam teklimakan ependi kéyinki ikki hepte ichide türkiyede 5 sheherde Uyghurlar toghrisida pa'aliyet élip bérilghanliqini bayan qildi.

Toluq bet