Kériyide qetle qilinishqa duch kelgen 4 yérim ayliq hamilining ata-anisi doxturxanidin qachti

Kériyining arish yézisida ötken heptining charshenbe we peyshenbe künliri, xitay da'iriliri 4 neper hamilidar ayalgha qarita bala chüshürüsh opératsiyisi élip bérip 5 ayliqtin 9 ayliqqa qeder bolghan 4 hamilini qetle qilghan idi.

Qetli'am kériyidiki nurluq doxturxanisida élip bérilghan idi.  Melum bolushiche  mezkur doxturxanida qetle qilinishni kütüp yatqan yene bir 4 yérim ayliq hamilining ata-anisi tünügün chüshtin kéyin doxturxanidin qachqan. Ular mökünüsh arqiliq xitay da'irilirining bu qetli'amdin waz kéchishini kütmekte. Bügün muxbirimizning so'allirigha jawab bergen mezkur yéza bashliqi, ehwal axbaratqa ashkarilan'ghandin kéyin, hamile qetle qilishni waqtinche toxtatqanliqini bayan qildi.

Weqening dunyagha ashkarilan'ghanliqidin az-tola ümidlen'gen metqurban nuri we uning hamilidar ayali rozixan memet, tünügün ziyaritimizni qobul qilghandin kéyin doxturxanidin ün-tünsiz chiqip ketken.

Muxbir: siz hazir qeyerde?
Metqurban: biz hazir sirtta. Tünügün doxturxanigha 2300 yüen opératsiye pulini tapshuruwétip, bizge qarawatqan mehelle bashliqi bizdin uzaqlashqan waqitta ghippide yénip chiqtuq.

Muxbir: planinglar néme?
Metqurban: birqanche kün'giche körünmey yürsek, weziyet ongshulup qalar dep oylawatimiz.
Muxbir: doxturxanidin qéchip chiqiwatqan waqtinglarda silerning aldinglarni tosquchilar chiqmidimu?
Metqurban: yaq, undaq bolmidi. Rast, yene bir ish: 4-5 yilining aldida kopératsiyige, yeni dadüyge 35 ming som ötne bérip turghan idim؛ bu pulni nechche qétimlap yalwurup sorisammu  téxiche manga qayturmaywatqan, ülüshkün  bizni doxturxanigha ekélishning aldida sékrétar  shu 35 ming som pulni aldimgha qoyup, eger balini chüshürseng mushu pulungni qayturimiz dégen؛ menmu maqul dep pulni alghan idim. Shunga tünügün doxturxanidin qachqan chéghimda shu pulni tartip éliwalmisun dep qorqup, bankidiki 30ming som qerzimni qayturuwaldim....
Muxbir: bolidu, sizge xatirjemlik tileymiz, biz bashqilar bilen körüshüp baqayli.....

Muxbir:  siz yéza bashliqi enwer isma'ilmu?
Yéza bashliqi: men mu'awin yéza bashliqi enwer mömin.
Muxbir: silerning bu yerde néme ish bolup kétip baridu hazir?
Yéza bashliqi: héch ish bolmidi, bizning bu yerde?
Muxbir: balilarni öltürüsh,   ana qarnidiki 5-6, 7-8 ayliq balilarni qetle qilish adettiki ishmu silerning bu yézida?
Yéza bashliqi: ....
Muxbir: bu tunji qétim yüz bergen ishmu bundin burunmu boluwatqanmu?
Yéza bashliqi: tunji qétim.  Tunji qétim boluwatidu. Pilanliq tughut siyasitide déhqanlargha 3 perzent déyilgen bolghachqa.....
Muxbir: san'ghu shundaq. Biraq 4 ayliqtin ashqan balilarni chüshürüshke bolmaydighanliqidin xewiringlar barmu-yoqmu silerning?
Yéza bashliqi: xewirimiz bar. Biraq wilayet  bu ishni bek ching tutidu, bir balimu oshuq tughulsa bolmaydu dep telep qoyidu؛ uning üstige bir bélet bilen hemmini ret qilish deydighan tüzüm bar, bu dégenlik yézida bir bala oshuq tughulsa, yézining bashqa xizmetliri aptonom rayon boyiche aldinqi qatarda bolsimu hésabqa élinmaydu, bésim bek éghir...
Muxbir: wilayettin bésim éghirmu bu jehettin?
Yéza bashliqi: yaq déhqanlardin. Déhqanlarni ching tutsaq qéchip kétip sirtta tughup kélidu, gep anglimaydu, mushu qétimqi hemmisi sawatsizlar......
Muxbir: biraq hazir silerning jazalawatqininglar siz sawatsiz dewatqan u déhqanlar emes, ana qarnidiki bigunah bowaq, bir jan. Siler mushularni nurluq doxturxanisigha qandaqlarche tutquzup qoyalidinglar?
Yéza bashliqi: aptonom rayonluq pilanliq tughut komitétining munasiwetlik höjjetliride....
Muxbir: shu höjjette 4 ayliq yuqiri hamilini chüshürüwétishke bolidu dégen madda barmikin?
Yéza bashliqi: undaq yoq. Biraq pilanliq tughut döletning tüp siyasiti bolghandikin ching tutmisaq bolmaydiken.
Muxbir: siler mushu hepte ichide hazirghiche chüshürüwetken bala qanche?
Yéza bashliqi:  üchqu deymen, men bu ishqa yéngi mes'ul boldum, tepsilatini uqmaymen.
Muxbir: hazir siler chüshürmekchi bolghan yene qanchisi bar?
Yéza bashliqi: emdi yoq, undaq qilishni toxtattuq.
Muxbir: qachandin béri toxtattinglar?
Yéza bashliqi: tünügündin béri toxtattuq.
Muxbir: néme seweb bilen, qandaq bir uqturush bilen toxtattinglar:
Yéza bashliqi: tünügün wilayette kéngeytilgen yighin échiliwatqan, shu yerge merkezdin téléfon keptu, shuning bilen toxtattuq. Tünügün metqurban dep  birsini qoyup berduq.
Muxbir: metqurban ayali bilen doxturxanidin qachtimu yaki siler qoyup berdinglarmu?
Yéza bashliqi : biz qoyup berduq.
Muxbir: pat arida uni yene tutush, doxturxanigha ekélish éhtimalinglar barmu?
Yéza bashliqi: yaq undaq qilmaymiz.

Yuqiriqi yéza bashliqi kériyining arish yézisida yüzbergen hamile qetle qilish weqesini wasitilik halda wilayetke artmaqta. Yene melum bolushiche mezkur yéza rehberlirining hamile qetle qilishni toxtitishi peqet béyjingdin kelgen namelum  bir téléfon'gha asasenla qarar qilin'ghan. Bu heqte mexsus chüshken birer yazma höjjet yaki uqturush hazirche melum emes.