Bügürdiki zenjirsiman partlashtin kéyin da'iriler öymu-öy nopus éniqlashqa bashlighan

Muxbirimiz qutlan
2014-09-24
Share
bugur-partlash-weqesi-weibo.jpg Bügür nahiyiside yüz bergen partlashtin körünüsh. 2014-Yili 21-séntebir.
Social Media

Igilishimizche, 21-séntebir bügürning birqanche jayida zenjirsiman partlash yüz bergendin kéyin, da'iriler nahiye teweside birqanche kün'giche qatnashni üzüp tashlighan.

Nöwette yerlik da'iriler saqchixanilarning maslishishi bilen bügür nahiyesining herqaysi yéza-bazarlirida, bolupmu partlash yüz bergen yéngisar baziri bilen térekbazar yézisida öymu-öy bésip nopus éniqlawatqanliqi melum.

Ziyaritimizni qobul qilghan bügür nahiye yéngisar bazar bartoghraq kentining sékrétari ablikim mezkur kentning yéqinqi üch kündin buyanqi ehwalidin uchur berdi.

Uning bildürüshiche, yéngisar baziri bilen térekbazar yézisida zenjirsiman partlash yüz bergendin kéyin nahiye teweside omumyüzlük ammiwi qatnashlar toxtitilip, kishilerning öyliridin chiqmay olturushi uqturulghan.

23-Séntebirdin bashlap mezkur yézidiki kishiler tala-tüzge chiqip kündilik soda-sétiq we hoyla-aramlirining ishlirini qilishqa bashlighan, emma yéza tewesidin bashqa jaylargha bérishigha yenila yol qoyulmighan.

Mezkur yézidiki mekteplerdimu uda 3 kün'giche ders toxtitilip taqalghan. Bartoghraq kentining sékrétari ziyaritimiz jeryanida bügünmu balilarning mektepke barmighanliqini bildürdi.

Kent sékrétari ablikimning bildürüshiche, bügürdiki zenjirsiman partlashtin kéyin kenttin yuqiri derijilik kadirlargha jiddiy yighin échilghan. Herqandaq ademning weqede ölgen yaki yarilan'ghan kishilerning sanini sürüshtürüshke bolmaydighanliqi, mes'ul kadirlarning öz ornida kéche-kündüz nöwetchilikte turushi lazimliqi uqturulghan.

Yuqiridin chüshken buyruq boyiche, herqaysi kentlerning mes'ul kadirliri saqchilarning maslishishi bilen öymu-öy yürüp nopus éniqlashqa bashlighan. Ular bügürdiki partlash weqesidin ilgiri türlük sewebler bilen yurtidin ayrilip bashqa jaylargha seper qilghan kishilerning tizimini turghuzghan. Her bir a'ilidin sirtqa seperge chiqip ketken a'ile ezaliri we uruq-tughqanlirining hazir qeyerde, néme ish bilen shughulliniwatqanliqi shuningdek alaqilishish adrési heqqide uchur bérishni telep qilghan. Yene bir tereptin, yéqinqi birqanche aydin buyan sirttin kelgen ademlerning ehwali, ularning kimler bilen alaqiliship, kimlerning öyide turghanliqi heqqidiki tepsiliy uchurlar sürüshte qilin'ghan.

Kent sékrétari ablikim yene, partlash weqesini sadir qilghuchi gumandarlar ichide sirttin kelgenlerningmu hem bügürning özidiki yerlik kishilerningmu barliqini ilgiri sürdi. Halbuki, u gumandarlarning kimliki we hazirqi ehwali heqqide soralghan so'allirimizgha "Xewirim yoq" dégen söz bilen jawab bérishni ret qildi.

U yene bu qétimliq partlitish nishanining yéziliq hökümet, saqchixana qatarliq hökümet organlirigha qaritilghanliqini tilgha aldi.

Uning bildürüshiche, bir qisim yerlik déhqanlar yekshenbe küni bolghachqa yéza bazirigha sodiliq qilghili bérip partlash weqesige toghra kélip qalghan, beziliri éghir yarilan'ghan. U bartoghraq kentidin bu qétimliq partlashta éghir yarilan'ghan ikki kishining yéngila opératsiyedin chiqqanliqini, téxiche hoshigha kelmigenlikini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet