D u q re'isi dolqun eysa awstraliye ziyaritini bashlidi

14-Noyabirdin bashlap amérika we yaponiyede ziyarette bolghan d u q re'isi dolqun eysa ependi 28-noyabirdin bashlap awstraliye ziyaritini bashlighan. U bügün awstraliyening sidnéy shehiridin ziyaritimizni qobul qilghanda aldi bilen amérikidiki ziyariti jeryanida élip barghan pa'aliyetlirini bir qur eslep ötti.

Dolqun eysa ependi sözide yaponiye ziyaritiningmu netijilik ötkenlikini, bu netijining béshida yaponiyediki Uyghur jama'itige muhajirettiki Uyghur milliy dewasini tonutush hemde ularni Uyghur dewasi sépige qoshushtin ibaret jiddiy bir éhtiyajni orundash qedimining bésilghanliqi ikenlikini eskertti.

Dolqun eysa ependining awstraliye ziyariti bir heptidin artuq dawam qilidiken. U bu heqte toxtalghanda awstraliyening Uyghurlar we jaza lagérliri mesiliside hésdashliqini qolgha keltürüsh zörür bolghan muhim bir dölet ikenlikini tekitlidi.

Dolqun eysa ependi ziyaretliri esnasida awstraliye dölet xadimliri bilen uchrishishlar ötküzidiken we metbu'atlarning ziyaretlirini qobul qilish, uniwérsitétlarda nutuq sözlesh qatarliq pa'aliyetlerde bolidiken. Bu ziyaret guruppa sheklide élip bérilidighan bolup, uninggha d u q ijra'iye komitétining re'isi ömer qanat, adwokat nuri türkel we amérikidiki Uyghur kishilik hoquq qurulushining xadimi lu'isa xanimlar hemde awstraliyediki Uyghur siyasiy aktiplirimu hemrah bolidiken. 
Awstraliyediki Uyghur jama'et erbabi jür'et ependi d u q re'isining awstraliye ziyariti toghrisida toxtalghanda bu qisqighina bir hepte ichide awstraliyening 4 chong shehiride köpligen pa'aliyetler élip bérilidighanliqini, d u q re'isi dolqun eysa ependini awstraliyediki Uyghur jama'iti bilen yüz körüshtüridighanliqini tilgha aldi. 

D u q re'isi dolqun eysa ependi sözide awstraliye ziyariti jeryanida awstraliyediki Uyghur jama'iti we Uyghur teshkilatliri bilen bolidighan pa'aliyetlirining bu qétimqi ziyaretning muhim meqsetliridin biri ikenlikini bayan qildi.