D u q re'isi dolqun eysa norwégiyede bir heptilik ziyarette bolidiken

Igilishimizche, 13-séntebirdin buyan fransiyening sawoy we shiwétsariyening jenwe sheherliride bir qatar siyasiy pa'aliyetler bilen meshghul bolghan d u q ning re'isi dolqun eysa ependi b d t diki mujadilisi axirlashmay turupla norwégiyediki bir heptilik ziyaritining kentertiplirini aldin tüzüp chiqqan. Dolqun eysa ependining bildürishiche, u 22-séntebirdin bashlap norwégiyening oslo we bashqa sheherliride élip baridighan bir heptilik pa'aliyetliri jeryanida norwégiye tashqiy ishlar ministérliqining xadimliri, norwégiye parlaméntining ezaliri hem dölet erbabliri bilen uchrishishlar ötküzidiken.

Norwégiye Uyghur komitétining re'isi bextiyar ömer ependi bu heqte toxtalghanda, d u q re'isi dolqun eysaning norwégiyediki bir heptilik ziyariti üchün norwégiye hökümiti we rafto fondi qatarliq orunlarda birqanche muhim uchrishishlarni orunlashturiwatqanliqini tilgha aldi.

Dolqun eysa ependi bu qétimqi ziyariti jeryanida yene norwégiyediki Uyghur teshkilatliri we jama'etliri bilen söhbetler élip baridiken hemde ularni 11-ayning 6-küni jenwede ötküzülmekchi bolghan keng kölemlik namayishqa seperwerlik qilish heriketliri bilenmu shughullinidiken. D u q ijra'iye komitétining norwégiyediki mu'awin re'isi semet abla ependi bu heqte toxtalghanda qurultay re'isining norwégiye Uyghur jama'iti bilen élip baridighan uchrishishliri üchün norwégiyediki teshkilatlar we yashlar qoshunining pa'al teyyarliq qiliwatqanliqini alahide eskertti. 

Norwégiyediki Uyghur yashlirimu d u q re'isi dolqun eysa ependini kütiwélish üchün jiddiy hazirliqqa kirishken bolup, norwégiyediki yashlar wekili férdun ependi bizni bu heqte bezi melumatlar bilen teminlidi.

D u q re'isi dolqun eysa bashchiliqidiki Uyghur wekillirining b d t kishilik hoquq kéngishining 39-nöwetlik yighinidiki pa'aliyetliri 21-sintebir küni axirlashti. Qurultay xadimliri 20-séntebir we 21-séntebir künlirimu b d t da munasiwetlik xadimlar bilen muhim uchrishishlar ötküzdi hemde b d t yighinlirida Uyghur diyaridiki jaza lagérliri mesilisini keng türde tonutush pa'aliyetlirini toxtawsiz dawamlashturdi. Bu xususta kéyinki programmilirimizda tepsiliy melumat bérishke tirishimiz.