Уйғурлар 1-өктәбир күни әнқәрәдики хитай әлчиханиси алдида хитайға наразилиқ намайиши өткүзди

Ихтиярий мухбиримиз әркин тарим
2015.10.01
enqere-1-oktebir-namayish-2.jpg Хитайниң әнқәрәдики баш әлчиханиси алдида өткүзүлгән хитайға наразилиқ намайишидин көрүнүш. 2015-Йили 1-өктәбир, түркийә.
RFA/Erkin Tarim

Дуня уйғур қурултийиниң орунлаштуруши билән 1-өктәбир күни хитайниң әнқәрәдики баш әлчиханиси алдида намайиш өткүзүлди.

Дуня уйғур қурултийи 9-айниң бешида чақириқ елан қилип “1-өктәбир хитай һөкүмити тәнтәнә билән өткүзмәкчи болған аталмиш ‛уйғур аптоном райони‚ қурулғанлиқиниң 60 йиллиқ той күни болса, шәрқи түркистан хәлқи үчүн бир матәм вә мусибәт күнидур!” дәп җакарлап, бу мунасивәт билән чәтәлләрдики пүтүн шәрқи түркистан аммиви тәшкилатлирини, уйғур җамаитини 1-өктәбирниң алди-кәйнидә, өзлири паалийәт елип бериватқан дөләтләрдә намайиш, мәтбуат баянати елан қилиш йиғини вә йиғин қатарлиқ паалийәтләрни елип беришни тәләп қилған иди.

Мана бүгүн, 1-өктәбир күни түркийәниң пайтәхти әнқәрәниң гази османпаша райони гөлгәли кочисидики хитай әлчиханиси алдида намайиш өткүзүлмәктә. Бу намайишқа қәйсәридә паалийәт елип бериватқан шәрқий түркистан мәдәнийәт вә һәмкарлиқ тәшкилати рәиси сейит түмтүрк башчилиқида қәйсәридин кәлгән уйғурлар, әнқәрәдики бәзи аммиви тәшкилат мәсуллири вә әнқәрәлик уйғурлардин болуп 120 әтрапида киши қатнашти. Намайишчилар қолида шәрқий түркистанниң ай юлтузлуқ көк байриқи, түрк байриқи вә һәр хил лозункиларни көтүргән һалда, “хитай шәрқий түркистандин чиқип кәтсун, шәрқий түркистанға әркинлик, шинҗаң әмәс шәрқий түркистан, уйғурларға әркинлик, түркийә ухлима қериндашлириңға игә чиқ” дегәндәк шоарларни товлашти. Арқидин д у қ муавин рәиси сейит түмтүрк әпәнди мухбирларға, хитайниң 60 йилдин буян уйғурларға қарита йүргүзүватқан миллий кәмситиш, зулум вә бесим сиясити паш қилинған вә әйиблигән мәзмунда наразилиқ баянати елан қилди.

У, баянатида хитай һөкүмитиниң ар-номус қилмастин қош байрам дәп елан қилған 1-өктәбир күниниң уйғурлар үчүн матәм вә мусибәт күни икәнликини, бундин 66 йил бурун уйғурларниң өз земиниң хитай коммунистлири тәрипидин бесивелинған күн икәнликини, бундин 60 йил бурун болса уйғурларниң сахта аптономийә билән алдитилған бир күн икәнликини баян қилди. У баянатида 66 йилдин бери уйғур хәлқиниң ирқий қирғинчилиқ, ассимилятсийә, кәмситишкә учраватқанлиқини буниңға хатимә бериш вақтиниң аллаһ бурун кәлгәнликини, дуня дөләтлириниң хитайға бесим ишлитип буниңға хатимә бериши керәкликини баян қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.