8 Ming tal etirgül we Uyghurlarning yürek sadasi

D u q medeniyet komitéti mudiri zeynidin ependi gollandiye parlamént binasi aldida 8 ming tal etirgül bilen gülchembirek tizip, Uyghur élidiki qirghinchiliqlarda hayatidin ayrilghanlarni xatirilidi. D u q re'isi dolqun eysa ependimu alayiten gérmaniyedin kélip, gollandiyede ötküzülgen bu qétimqi namayish we xatirilesh pa'aliyetlirini qollidi. 2018-Yili 5-féwral, gollandiye.

Gollandiyede ötküzülgen “5-Féwral ghulja weqesi” ni xatirilesh namayishida 8 ming tal etirgül ishlitilip, kishilerning diqqiti jelp qilin'ghan.

5-Féwral küni gollandiyening denxag shehiridiki parlamént binasi aldida ötküzülgen “5-Féwral ghulja weqesi” ning 21 yilliqini xatirilesh namayishida 8 ming tal etirgül bilen yürek sheklide gülchembirek yasilip, parlamént ezaliri we gollandiye jama'itining küchlük diqqitini jelp qilghan. Gollandiyede ötküzülgen bu qétimqi namayishqa gérmaniyedin alayiten bérip qatnashqan dunya Uyghur qurultiyining re'isi dolqun eysa ependi ziyaritimizni qobul qilip, bu hayajanliq menzire heqqide toxtaldi.

Gollandiyediki Uyghur ziyaliysi abdusalam ependimu 8 ming tal etirgül bilen élip bérilghan bu namayishning kishilerning diqqitini jelp qilishta heqiqeten zor rol oynighanliqini tilgha aldi.

Namayishlarni özliri yashawatqan döletlerdiki yerlik xelqlerning diqqitige ulashturush, Uyghurlarning yürek sadasini téximu ünümlük anglitish üchün Uyghur namayishchilar yéqinqi mezgillerdin buyan her türlük usullargha muraji'et qilmaqta. 3-Féwral küni bélgiyediki Uyghurlarmu ay-yultuzluq kökbayraqqa maslashturup kök bayraq renggide kiyim kiyip namayish qilish arqiliq bélgiye xelqining diqqitini jelp qilishqa tirishqan idi. Bu heqte bélgiyediki Uyghur ziyaliysi gülnisa xanim melumat bérip, namayishning nahayiti netijilik bolghanliqini tilgha aldi.

D u q ning re'isi dolqun eysa ependi, bundaq özgiche usulda namayish qilishning ünümige yuqiri baha berdi. Etirgüldin gülchembirek yasap öz millitining yürek sadasini anglitish usulining ijadchisi bolghan d u q medeniyet komitétining mudiri zeynidin ependi Uyghur jama'itini herxil yéngiliqlarni sehnige élip chiqishqa dewet qildi.

Gollandiyediki “Uyghur nidasi” tor radiyosining mes'uli abdusalam ependi, bu qétim gollandiyede élip bérilghan namayishning ilgiriki yillargha qarighanda tesirlik, netijilik ötkenlikini mu'eyyenleshtürdi.

Melum bolghinidek, muhajirettiki Uyghurlarning bu yilqi “5-Féwral ghulja weqesi” ni xatirilesh namayishi ilgiriki yillargha sélishturghanda kölimi we tesiri jehettin zor derijide perqlen'gen idi. Uyghur diyarida xitayning yuqiri bésimliq siyasiti barghanséri küchiyiwatqan bu zamanda amérika, yawropa we türkiye qatarliq ellerde yüzligen, minglighan Uyghurlar namayish sépige qoshulup, özlirining xitay mustemlikisige bolghan qarshiliq iradisini namayan qilmaqta.