Финландийәдики уйғурлар «5-июл үрүмчи вәқәси» ниң 9 йиллиқи мунасивити билән намайиш өткүзди

Ихтиярий мухбиримиз арслан
2018-07-09
Елхәт
Пикир
Share
Принт
«5-Июл үрүмчи вәқәси» ниң 9 йиллиқи мунасивити билән финландийә пайтәхти хелсинки шәһиридә өткүзгән намайишидин көрүнүш. 2018-Йили 7-июл.
«5-Июл үрүмчи вәқәси» ниң 9 йиллиқи мунасивити билән финландийә пайтәхти хелсинки шәһиридә өткүзгән намайишидин көрүнүш. 2018-Йили 7-июл.
RFA/Arslan

«5-Июл үрүмчи вәқәси» ниң 9 йиллиқи мунасивити билән финландийәдә яшаватқан уйғурлар 7-июл күни финландийә пайтәхти хелсинки шәһиридә намайиш елип барди.

Финландийә шәрқий түркистан җәмийитиниң уюштуруши билән елип берилған бу намайишқа 100 дин артуқ киши қатнашқан болуп, намайишчилар ай-юлтузлуқ көк байрақни көтүргән һалда финландийә парламент алдиғичә йүрүш қилип, хитайға қарши һәр хил шоарларни товлиди.

Намайишчилар бирдәк «уйғурларға әркинлик», «шәрқий түркистанға әркинлик», «биз адаләт тәләп қилимиз», «вәтән үчүн җеним пида», «ши җинпиң террорчи» дегәндәк шоарларни товлиди.

Намайишчилар қоллирида йәнә америка байриқи билән чоң хәтләр йезилған лозункилар көтүргән иди. Чоң хәтлик лозункиларда «хитайниң бигунаһ уйғурларни җазалишиға рухсәт қилинмисун», «сиясий мәһбусларниң ички әзалирини елиши тохтитилсун», «хитай җаза лагерлиридики 1 милйон уйғурни қоюп бериши керәк» дегәнгә охшаш шоарлар йезилған иди. Нәқ мәйдандин зияритимизни қобул қилған уйғурлар намайишчиларниң хелсинки кочилирини ләрзигә кәлтүргәнликини, йәрлик финларниң бу намайишниң мәқсити сорап намайишчиларға һесдашлиқ қилғанлиқини билдүрди.

Финландийә шәрқий түркистан җәмийитиниң мәсули обулқасим сәид әпәнди телефон зияритимизни қобул қилип, бу қетимлиқ намайишниң әһвалини тонуштуруп өтти.

Финландийәдә яшаватқан уйғур паалийәтчиләрдин доктор муһәммәд ели әпәнди бу намайиш тохрисида тохтилип, 7-айниң 7-күни елип барған намайишниң һаяҗан қизғинлиқ ичидә яхши өткәнликини, намайишқа уйғурлардин сирт йәрлик финлар билән бир қисим әрәбләр болуп 150 әтрапида кишиниң қатнашқанлиқини, намайишчиларниң җәңгивар шоарлири билән җәвлан қилип турған ай-юлтузлуқ көк байрақларниң хелсинки кочилирини ләрзигә кәлтүргәнликини билдүрди.
Намайишқа актип қатнашқан уйғур паалийәтчи әнвәрҗан бу намайишниң мәқсити тоғрисида тохтилип мундақ деди: «бу қетим хелсинкида өткүзүлгән бу намайиш наһайити дағдуғилиқ яхши өтти.

Бу намайишни уюштуруштики асасий мәқсәт болса, 2009-йили үрүмчи йүз бәргән қанлиқ вәқәни дуняға аңлитиш, дуняниң диққитини тартиш һәм өзимизму бу вәқәни әсләп туруш үчүндур.

Намайишниң йәнә бир мәқсити болса һазир вәтинимиздә хитайниң җаза лагерлирида бигунаһ йетиватқан ата-анилиримиз, ача-сиңил, ака-инилиримизниң ечинишлиқ әһвалини дуняға аңлитип, башқиларниң игә чиқишини қолға кәлтүрүш үчүн болди. Мән шуни һес қилдимки, әгәр биз күчимизниң йетишичә иш қилсақ, бизни қоллайдиғанлар һәр заман, һәр йәрдә тепилидикән.»

Финландийәдики уйғур паалийәтчиләрдин йәнә абдулһәпиз әпәнди бу намайиштин алған тәсиратини билдүрүп мундақ деди: «уйғурлар бирликкә келип бир яқидин баш чиқарса, шу бирликтин күч туғулидикән вә бизниң авазимиз дуняға техиму яхши аңлинидикән.»

Игилишимизчә, финландийәдә 1990-йилларниң ахирлиридин башлап уйғурлар олтурақлишишқа башлиған болуп, һазир бу дөләттә нәччә йүзлигән уйғурлар яшимақтикән. Йеқинқи йиллардин буян финландийәдики уйғурлар тәшкилатларға уюшуп җамаәтлик паалийәтләрни елип беришниң муһимлиқини, пәрзәнтлирини уйғур миллий әнәниси вә кимлики бойичә тәрбийәләшниң зөрүрлүкини вә шундақла муһаҗирәттики уйғур давасиға актиплиқ билән қатнишишниң тәқәззалиқини тонуп йәтмәктикән.

Пикирләр (0)
Share
Толуқ бәт