Австралийәниң адилайд шәһиридә “5-феврал вәқәси” ниң 18 йиллиқи хатириләнди

5-Феврал ғулҗа вәқәсиниң 18 йиллиқи мунасивити билән австралийәниң адилайд шәһиридә шәрқий түркистан австралийә җәмийитиниң орунлаштурушида хатириләш паалийити өткүзүлди вә шеһитларға атап дуа-тилавәтләр қилинди.

Паалийәт адилайдтики уйғурларниң диний алими, имам абдусалам алим әпәндиниң қуран тилавәт қилиши билән башланди.

2 Саәт давамлашқан бу йиғилишта шәрқий түркистан австралийә җәмийитиниң рәиси абдулғопур мөмин әпәнди “қанлиқ қисмәт, ибрәтлик һекмәт, үмидвар келәчәк” дегән темида, шәрқий түркистан австралийә җәмийитиниң катипи нурмуһәммәт түркистани “5-февралдин һазирғичә йүз бәргән вәқәләр вә уйғурлуқ мәсулийити” темисида тохтилип өтти. Йиғинда йәнә вәқә шаһитлири сөзгә чиқип вәқәниң әһмийити, тәсири һәққидә тохтилип өтти һәм ғулҗа вәқәсиниң, шеһитларниң унтулмайдиғанлиқи һәққидә сөзләр қилишти.

Паалийәттә йәнә, адилайд шәһиридә хизмәт һәм оқуштин сирт паалийәтләрни елип бериватқан яшлар һәм оқуғучилар өзлириниң йеқиндин буян қилған ишлиридин һәм кәлгүсидики пиланлиридин җамаәткә доклат берип өтти.

Паалийәттин кийин зияритимизни қобул қилған нурмуһәммәт түркистани әпәнди бу һәқтики өз қарашлирини көпчилик билән ортақлашти.

Бу қетимқи хатириләш сөһбәт йиғини көпчиликниң шеһитларға шундақла хитай зулуми астида қийниливатқан қериндашлириға атап дуа қилиши билән ахирлашти.