Ilham toxti guruppisi 2019-yildiki pa'aliyet pilanlirini otturigha qoydi

Gérmaniyediki “Ilham toxtini qollash guruppisi” ning mes'uli enwerjan ependi radiyomiz ziyaritini qobul qilip, 2018-yilning xitay hökümitining Uyghurlargha qaratqan basturushi eng éghir bolghan, milyonlarche Uyghur lagérlargha qamilip, ilim ademliri türküm-türkümlep tutqun qilin'ghan, Uyghurlar étnik tazilashqa duch kelgen qabahetlik bir yil bolghanliqini ilgiri sürdi. U shundaq bolushigha qarimay 2018-yilning Uyghur mesilisining xelq'aralishishi kücheygen bir yil bolghanliqini tekitlidi. U bashqa Uyghur teshkilatlirigha oxshash “Ilham toxtini qollash guruppisi” ningmu bu jehette élip barghan xizmetlirini xulasilidi.

Enwerjan ependi bayanida “Ilham toxtini qollash guruppisi” ning 2018-yilliq pa'aliyetliride xitay hökümiti teripidin muddetsiz qamaqqa höküm qilin'ghan Uyghur ziyaliysi ilham toxtigha erkinlik telep qilish we ilham toxti ependini “Saxarof erkinlik mukapati”, “Nobél tinchliq mukapati” qatarliq xelq'arada tesiri bolghan kishilik hoquq mukapatlirigha namzat qilip körsitish ishlirini tilgha élip ötti. U yene xitayning “Terbiyelesh merkezliri” dep atalghan jaza lagérlirigha qamalghan Uyghurlargha erkinlik telep qilip uyushturulghan muhakime yighinliri bilen namayish pa'aliyetlirinimu sanap ötti.

“Ilham toxtini qollash guruppisi” ning ezaliridin firansiyediki parizh sheher uniwérsitétining proféssori, kishilik hoquq pa'aliyetchisi mari holismen xanimmu ilham toxti mesilisini gherb démokratik döletlirige anglitishta izchil halda xizmet qilip kelgen pa'aliyetchilerning biri.

Mariy holismen xanim ilham toxti ependini “Nobél tinchliq mukapati”, “Saxorof erkinlik mukapati” qatarliq xelq'araliq mukapatlargha körsitish xizmitining mezkur teshkilatning muhim xizmetlirining biri ikenlikini bildürdi.

Mariy xanim bayanida yene “Ilham toxtini qollash guruppisi” we xelq'ara kechürüm teshkilatining tirishchanliqi netijiside ilham toxtining 2018-yilliq “Nobél tinchliq mukapati” gha körsitilgen 330 namzatning biri bolghanliqini bildürdi.

Mariy xanim yene “Ilham toxtini qollash guruppisi” ning bundin kéyinki pa'aliyetliride ilham toxti ependini kéyinki yillardiki “Nobél tinchliq mukapati”, “Saxarof erkinlik mukapati” gha oxshash xelq'araliq mukapatlargha dawamliq namzat qilip körsitishning ehmiyiti heqqidimu toxtaldi. U bayanida xelq'arada tesiri zor bolghan bu xil mukapatlarning xelq'ara jem'iyetning ilham toxti mesilisi arqiliq Uyghurlar weziyitige bolghan diqqitini qozghash we gherb démokratik hökümetlerning Uyghurlar mesiliside xitaygha bésim qilishida melum ünümi bolidighanliqini ilgiri sürdi.

Enwerjan ependi “Ilham toxtini qollash guruppisi” ning 2019-yildiki pilanliri heqqidimu toxtilip ötti.

U bayanida ilham toxtini2019-yilliq “Nobél tinchliq mukapati”, “Saxarof erkinlik mukapati” qatarliq xelq'araliq kishilik hoquq mukapatlirigha namzat qilip körsitish we ilham toxti muhakime yighinliri uyushturush qatarliq pa'aliyetlerde bolidighanliqini bildürdi. U yene özlirining nöwette yawropa parlaménti we amérika qatarliq gherb démokratik döletliridiki tesiri küchlük siyasiy erbablarning qollishini qolgha keltürüsh üchün tirishchanliq körsitiwatqanliqini tekitlidi.

Enwerjan ependi sözining axirida yene ilham toxti ependini xelq'araliq mukapatlargha körsitishning xelq'ara jem'iyetning Uyghur mesilisige bolghan diqqitini yenimu kücheytishte muhim ehmiyetke ige ikenlikini tekitlidi.

Awaz ulinishidin söhbetning tepsilatini anglighaysiler.