Güzelnur xanim da'irilerning ilham toxtigha töhmet qiliwatqanliqini tekitlidi

Muxbirimiz méhriban
2014-01-27
Share
ilham-toxti-guzelnur.jpg Ilham toxti ependi tutulup kétishtin ikki kün ilgiri xanimi güzelnur bilen öz öyide. 2014-Yili 13-yanwar, béyjing.
RFA/Méhriban

Ürümchi sheherlik j x idarisi 25-yanwar küni mikroblogida uchur tarqitip, öktichi ziyaliy ilham toxtining bölgünchilik qilghanliqini we hökümetni aghdurushqa qutratquluq qilghanliqini ilgiri sürgen. Ikki kündin buyan bu uchur yene xitaydiki her qaysi xewer wasitiliri we "Yershari waqit géziti" qatarliqlarda, shundaqla chet'el metbu'atlirida kéngeytip bésildi. Ilham toxti ependining ayali güzelnur xanim bir qisim chet'el metbu'atlirining ziyaritini qobul qilip, Uyghur aptonom rayon da'irilirining ilham toxti ependige töhmet qiliwatqanliqini tekitlimekte.

27-Yanwar radi'omiz ziyaritini qobul qilghan güzelnur xanim, ilham toxti ependining meyli dersxanida bolsun yaki chet'el metbu'atlirining ziyaretlirini qobul qilghan chéghida bolsun yaki élan qilghan maqale, eserliride bolsun, xitay hökümiti belgiligen qanun da'iriside turup, Uyghurlarning qanunda belgilen'gen heq-hoquqlirining emeliylishishinila telep qilghanliqini bildürüp, Uyghur aptonom rayon da'irilirining ilham toxti ependige gherezlik halda töhmet qiliwatqanliqini bildürdi.

Ürümchi j x idarisi 25-yanwar tarqatqan uchurda, "Razwédka qilip tekshürüshke qarighanda, merkiziy milletler uniwérsitéti oqutquchisi ilham toxti chet'eldiki sherqiy türkistan küchliri bilen til biriktürgen, intérnét arqiliq shinjang musteqilliqini terghib qilghan, ders munbiridin paydilinip hökümetni aghdurushqa qutratquluq qilghan, oqutquchiliq salahiyitidin paydilinip bölgünchilik bilen shughullan'ghan, döletni parchilashni meqset qilghan jinayetchiler guruhi teshkilligen we uninggha bash bolghan, dölet amanliqi we jem'iyet muqimliqigha éghir ziyan yetküzgen" dégen bayanlar bérilgen idi.

Güzelnur xanim bularning pütünley töhmet ikenlikini tekitlep, yillardin buyan ilham toxti ependi ötüwatqan dersning merkizi milletler uniwérsitéti özi testiqlighan ders ikenlikini bildürüp, ürümchi saqchi idarisining bu töhmitining put tirep turalmaydighan yalghanchiliq ikenlikini tekitlidi.

Güzelnur xanim yene ürümchi saqchi idarisining ilham toxtining ehwalini sürüshtürüp, ürümchige barghan adwokat li fangpingnimu jawabsiz qaytishqa mejbur qilghanliqini bayan qilip, meyli béyjing da'iriliri bolsun yaki ürümchi da'iriliri bolsun, nöwette éri ilham toxtining ehwali heqqide herqandaq uchur bérishni ret qilip kéliwatqanliqini bildürdi.

Güzelnur xanimdin uning a'ilisining ehwalini sorighinimizda, u bu heqte toxtilip, puqrache kiyin'gen saqchilarning yenila öyining etrapida bu a'ilini nazaret qilip turuwatqanliqini, özi meyli qandaq ish bilen sirtqa chiqsa nazaret qiliwatqan saqchilarning uninggha egiship, uning barliq ehwalini nazaret qilip mangidighanliqini, emma hazir ensirewatqini, atushta yene doxturxanigha kirip qalghan ilham toxti ependining késelchan anisi ikenlikini bildürdi.

Söhbitimiz axirida, güzelnur xanim ilham toxti ependining junggo qanunigha xilapliq qilidighan héchqandaq ish qilmighanliqini yene bir qétim tekitlep, Uyghur aptonom rayon da'irilirini ilham toxtigha u qilmighan jinayetlerni artmasliqqa, dunya jama'etchilikini ilham toxti we uning oqughuchilirining ehwaligha yéqindin köngül bölüshke chaqirdi.

Ilham toxti ependi 15-yanwar béyjingdiki öyidin tutup kétilgendin buyan, xitay ichi we chet'ellerde ilham toxti ependini shertsiz qoyup bérish heqqide imza toplash pa'aliyiti qanat yéyiwatqan bolup, 26-yanwar yekshenbe künigiche imza qoyghanlarning sani 1500 din ashqan. Yene bashqa uchurlardin melum bolushiche, béyjing saqchi da'iriliri 26-yanwar küni xitaydiki kishilik hoquq pa'aliyetchisi xu jyani öyidin élip ketken. Xu jya twitérda qaldurghan axirqi uchurida saqchilarning bu qétim uni chaqirtishigha, belkim uning Uyghur ziyaliysi ilham toxti ependi we adwokat shü jiyung heqqidiki chaqiriqliri shundaqla chet'el metbu'atlirining bu heqtiki ziyaritini qobul qilghanliqi seweb bolghan bolushi mumkinlikini eskertken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet