Ilham toxti yene bir xelq'araliq mukapatqa namzatliqqa körsitilgen

Muxbirimiz méhriban
2019-03-01
Élxet
Pikir
Share
Print
Muddetsiz qamaq jazasigha höküm qilin'ghan Uyghur ziyaliysi ilham toxti ependi.
Muddetsiz qamaq jazasigha höküm qilin'ghan Uyghur ziyaliysi ilham toxti ependi.
AP

2019-Yili kirgendin buyan xitay türmisidiki Uyghur ziyaliysi ilham toxti yene bir xelq'araliq mukapatqa namzatliqqa körsitilgen. Bu uning aldinqi yillardin buyan martén ennanis kishilik hoquq mukapati, barbara goldsimis erkinlik mukapati, türk dunyasi erkin yézish mukapati, nobél tinchliq mukapati we rafto mukapati qatarliq xelq'aradiki tesiri chong mukapatlargha namzatliqqa körsitilgendin kéyinki yene bir xelq'araliq mukapatqa namzatliqqa körsitilishi iken.

Gérmaniyediki "Ilham toxtini qollash guruppisi" ning mes'uli enwerjan ependining bildürüshiche, "Ilham toxtini qollash guruppisi" ning hawalisi bilen bu yil 2-ay ichide ilham toxti ependi amérikining nyuyork shehiride tesis qilin'ghan "Awam jasariti", yeni "Civil Courage prize" namliq kishilik hoquq mukapatigha namzat qilip körsitilgen. 

Gugul we wikipédiye qatarliq menbelerdiki uchurlardin melum bolushiche, "Awam jasariti" mukapati 2000-yili nortkot parkénson fondi teripidin tesis qilin'ghan iken. Mezkur mukapat zorawan küchlerdin kélidighan éghir bésim shara'itida qarshiliq körsetküchilerni teqdirlesh üchün tesis qilin'ghan iken. Mezkur mukapatning nami sabiq sowét ittipaqi dewride qurulghan gulag lagérlirini dunyagha ashkarilighan yazghuchi aléksandér soljénitsinning sözidin ilham élip qoyulghan iken. 2000-Yildin buyan bu mukapatqa érishkenler 20 din ashidighan bolup, ular ichide zor köpchiliki mustebit döletlerdiki yazghuchilar bilen kishilik hoquq pa'aliyetchiliri iken 

Enwerjan ependining bildürüshiche, ilham toxti ependining bu mukapatqa namzat qilip körsitilishi 2019-yili kirgendin buyan uning gherb dunyasidiki nobél tinchliq mukapati, rafto mukapati qatarliq meshhur xelq'araliq mukapatlargha namzat qilip körsitilgendin kéyinki yene bir qétim xelq'arada tesiri zor bolghan bir mukapatqa namzatliqqa körsitilishi hésablinidiken. 

Enwerjan ependi yene "Ilham toxtini qollash guruppisi" ning bu yil 2-ayda ilham toxtini norwégiyediki rafto kishilik hoquq mukapatigha namzat qilip körsetkenlikini bildürdi. Bu yil 1-ayning 28-küni norwégiye Uyghur komitéti bilen wakaletsiz milletler teshkilati aldi bilen ilham toxtini rafto mukapatigha namzatliqqa körsetken bolup, yéqinda "Ilham toxtini qollash guruppisi" mu ilham toxtini bu mukapatqa tekrar namzatliqqa körsetken iken. 

Norwégiye Uyghur komitétining re'isi bextiyar ömer ependimu radiyomiz ziyaritini qobul qilip, özlirining eyni chaghda wakaletsiz milletler teshkilati bilen birlikte ilham toxti ependini rafto kishilik hoquq mukapatigha namzat qilip körsitish jeryanida ishligen xizmetlirini tonushturup ötti. U ilham toxtining bu xil xelq'araliq mukapatlargha namzat qilip körsitilishining uning délosigha we Uyghur mesilisining xelq'aralishishigha körsitidighan ijabiy tesirliri heqqide toxtaldi. 

Enwerjan ependining bildürüshiche, ular hazir ilham toxti ependini bu yil3-ayda waslaw xawél kishilik hoquq mukapatigha, 9-ayda 2019-yilliq saxarof erkinlik mukapatigha namzat qilip körsitish üchün jiddiy teyyarliq xizmetlirini qanat yayduruwétiptu.

Toluq bet