Мәркизий милләтләр университети илһам тохтиниң хизмәт истажини бикар қилған

Мухбиримиз меһрибан
2014-05-16
Share
ilham-toxti-guzelnur-woeser.jpg Илһам тохти әпәнди тутулуп кетиштин икки күн илгири, тибәт аял язғучиси воәсәр илһам тохти әпәндиниң өйигә йоқлап кәлгәндә чүшкән хатирә сүрәт. Солдин оңға: илһам тохти, илһам тохтиниң ханими гүзәлнур вә воәсәр ханим. 2014-Йили 13-январ, бейҗиң.
RFA/Méhriban

Мәркизий милләтләр университети даирилириниң тутқундики уйғур зиялийси илһам тохтиниң хизмәт истажини бикар қилғанлиқи мәлум. Илһам тохтиниң аяли гүзәлнур ханимниң билдүрүшичә, у нөвәттә мәктәпниң мәзкур қарари үстидин әрз қилишқа һазирланған.

Алдинқи қетимлиқ аңлитишимизда илһам тохтиниң 8 яшлиқ оғлиниң сақчилар пәйда қилған роһий бесим түпәйли йүрәк аҗизлиқ кесилигә гириптар болғанлиқини хәвәр қилған идуқ. Бүгүн игилишимизчә, гүзәлнур ханимниң қаттиқ наразилиқи нәтиҗисидә бейҗиң сақчи даирилири илһам тохтиниң ишик алдиға орунлаштурған сақчилирини елип кетишкә мәҗбур болған.

Мәркизи милләтләр университетниң уқтурушида, 2014-йили 2-айдин башлап илһам тохтиға бу мәктәптин берилидиған маашиниң тохтитилидиғанлиқи вә мәктәптә ишлигән хизмәт истажиниңму бикар қилинғанлиқи, дөләт бекиткән асасий маашиниң пәқәт 75 пирсәнтиниңла балилириниң турмуш расхоти үчүн берилидиғанлиқи йезилған. Әмма, илһам әпәндигә бериливатқан маашниң қанчилик икәнлики һәққидә тохталмиған.

Мәктәп кадирлар бөлүминиң хадими гүзәлнур ханимға 5-айдин башлап балилирини беқиш үчүн берилидиған 2000 сом хәлқ пулиниң хитай хәлқ ишлар идариси тәрипидин бериш бәлгиләнгән балиларниң турмуш вә оқуш ярдәм пули икәнликини алаһидә әскәрткән.

Илһам тохти әпәнди тутқун қилинғандин кейин бу аилигә кәлгән еғир иқтисадий бесим вә роһи бесимла алдида қәддини тик тутуп кәлгәнликини билдүргән гүзәлнур ханим сөзидә, мәктәп даирилириниң ериниң 20 нәччә йиллиқ хизмәт истажини бикар қилинғанлиқини аңлиғандин кейин, мәктәпниң бу хил қанунсиз қилмиши үстидин әрз қилишқа тәйярланғанлиқини билдүрди.

Гүзәлнур ханим йәнә 8 яшлиқ оғлиниң йүрәк аҗизлиқи кесилигә гириптар болушиға бу аилини нәзәрбәнд қиливатқан хитай сақчилири сәвәб болғанлиқини ейтип, наразилиқ билдүргәндин кейин, каридорда бу аилини 24 саәт нөвәттә туруп назарәт қиливатқан сақчиларниң орун-көрпилирини йиғиштуруп кетишкә мәҗбур болғанлиқини, сақчиларниң әмди бу аилигә қаратқан ашкара назарәтни йошурун һаләткә өзгәрткән болуши мумкинликини илгири сүрди.

Гүзәлнур ханимниң билдүрүшичә, мәркизи милләтләр университети 2009-йили йүз бәргән 5-июл үрүмчи вәқәсидин кейин илһам әпәндини нәзәрбәнд қилип тәкшүргән мәзгилидиму униңға берилидиған маашини тохтитиветиш әһвали йүз бәргән.

Йеқинда америка қәләмкәшләр җәмийити тәрипидин ишләнгән илһам тохти әпәнди һәққидики һөҗҗәтлик филимдиму, илһам әпәндиниң 2009-йили 11-айда тибәт аял язғучиси воесер қатарлиқ достлири билән өткүзгән бир қетимлиқ синалғу хатирисидин нәқил елинған.

Әйни чағда илһам әпәнди баянида 2009-йилниң кейинки йерим йилида униң мааши тохтитилип, барлиқ банка һесаблири тақиветилгәнликини, бейҗиңдәк юқири истемал шәһиридә кичик оғлиға һамилидар болған аяли гүзәлнур, мәктәптә оқуватқан 15 яшлиқ қизи җәвһәр қатарлиқ бир аилә кишилириниң роһий вә иқтисадий җәһәттин еғир бесимға дуч кәлгәнликини, әмма өзиниң уйғурлар үчүн һәқни сөзләш ирадисидин янмайдиғанлиқи, бешиға келиш еһтимали болған әң еғир қисмәтләргиму тәйяр икәнликини билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт