Shi jinpingning ispaniye ziyariti harpisida ilham toxti guruppisi pa'aliyitini janlandurdi

Muxbirimiz méhriban
2018.11.27
ilham-toxti-guruppisi-ezaliri.JPG “Ilham toxti guruppisi” ezaliri yighindin kéyinki ziyapette. 2016-Yili 26-aprél, bérlin.
RFA/Ekrem

Gérmaniyediki “Ilham toxtini qollash guruppisi” ning bashliqi enwerjan ependining radiyomizgha bildürüshiche, mezkur teshkilat xitay re'isi shi jinpingning 28-29-noyabir künliridiki ispaniye ziyariti harpisida öz pa'aliyetlirini janlandurghan.

Enwerjan ependining bayanidin melum bolushiche, ötken hepte, u “Tehdit astidiki milletler teshkilati” ning bashliqi ulrix délyus bilen birlikte, ispaniye prézidénti pédro sanchézgha imzaliq mektup yollighan.

“Tehdit astidiki milletler teshkilati” ning bashliqi ulrix délyus ependimu ziyaritimizni qobul qilip, 16-noyabir küni ispaniye prézidénti pédro sanchézgha ewetilgen imzaliq xetning mezmuni heqqide toxtilip, munularni bildürdi: “Shundaq biz ötken hepte ispaniye hökümitining prézidénti pédro sanchézgha yézilghan imzaliq xetni yolliwettuq. Xette uning shi jinpingning ispaniye ziyariti mezgilide ‛qayta terbiyilesh merkezliri‚ namidiki jaza lagérlirining ehwalini shi jinpingdin sürüshtürüshini, naraziliq bildürüshini, xitay hökümitining u yerlerge qamalghan Uyghur qatarliq milyonlighan xelqni qoyup bérishini telep qilishini otturigha qoyduq. Emma söhbettin ilgiri bu mektubimizning qanchilik ijabiy netijisi bolidu, buni bilmeymiz. Bular, shi jinping bilen ispaniye prézidéntining söhbitidin kéyin éniq bolidu”. 

Ulrix délyus ependi yene mezkur imzaliq xette ilham toxti mesilisiningmu otturigha qoyulghanliqini bildürüp mundaq dédi: “Shundaq, xette yene ilham toxti mesilisini tekitlep öttuq, asasiy mesile Uyghurlarning omumiy weziyiti heqqide boldi. Ilham toxtining nöwettiki ehwalini sürüshtürüshni telep qilduq. Yighinlarda dawamliq tekitlep kéliwatimiz. Ilham toxti we Uyghurlar mesiliside yawropa parlaménti, firansiye hökümiti qatarliqlarning inkasliri birqeder jiddiy we aktip boldi. Hazir héchkim ilham toxtining ehwalidin xewerdar bolalmaywatidu, uning a'ile ezalirimu shundaq. Bu weziyet we uning ehwali bizni endishige salmaqta”.

Enwerjan ependi yene, ilham toxtini qollash guruppisining xitay re'isi shi jinpingning ispaniye ziyariti mezgilide orunlashturghan bashqa pa'aliyetliri heqqidimu toxtaldi.

Yawropa waqti boyiche 27-noyabir küni kech sa'et 6 lerde ispaniye paytexti madridqa yétip kelgenlikini bildürgen enwerjan ependi özlirining 28-noyabir künidiki shi jinpingning ispaniye ziyariti mezgilide uninggha qarshi ötküzülidighan naraziliq namayishigha jiddiy teyyarliq qiliwatqanliqini bildürdi.

U shi jinpinggha qarshi namayish jeryanida ilham toxtini qollash guruppisi namidin yézilghan, Uyghur diyaridiki jaza lagérlirini taqap, u yerlerge qamalghan Uyghur qatarliq milyonlarche xelqni derhal qoyup bérish we xitay türmisige naheq qamalghan Uyghur ziyaliysi ilham toxtini shertsiz qoyup bérish telep qilin'ghan ochuq xetning 2000 parchidin artuq köpeytilgen nusxisining madrid sheher ahalisigha tarqitilidighanliqini bildürdi.

Xelq'ara xewerlerdin melum bolushiche, nöwette yene bir qisim xelq'ara teshkilatlar, dunya Uyghur qurultiyi, tibet sürgündiki hökümiti we chet'ellerdiki xitay démokratik teshkilatliri ispaniye hökümiti we ispaniye prézidénti pédro sanchézning xitay re'isi bilen ötküzidighan söhbetliride xitaydiki insan heqliri mesilisini aldinqi orun'gha qoyushini telep qilghan.

Xelq'ara metbu'atlardiki uchurlardin melum bolushiche, xitay re'isi shi jinpingning 28-29-noyabir künliridiki ispaniye ziyaritide xitay bilen ispaniye otturisidiki soda munasiwiti asasliq söhbet témisi bolidiken. Shi jinpingning ispaniye ziyariti amérika qatarliq gherb döletliride Uyghur diyaridiki “Jaza lagérliri” ni taqash sadaliri küchiyiwatqan mezgilge toghra keldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.