Gollandiye qatarliq ellerdiki bir qisim Uyghurlar jenwediki namayishqa qatnishish üchün yolgha chiqti

Ixtiyariy muxbirimiz pida'iy
2016.09.15
Share on WhatsApp
Share on WhatsApp
gollandiye-jenwe-bdt-namayish.jpg Jenwediki b d t kishilik hoquq kéngishi merkizi binasi aldida ötküzülmekchi bolghan namayishqa qatnishish üchün yolgha chiqqan gollandiyediki Uyghurlar. 2016-Yili 15-séntebir.
RFA/Pida’iy

Jenwede ötküzülmekchi bolghan namayish teyyarliqi axirqi basquchqa kirdi. Gollandiyedin mezkur namayish pa'aliyitige baridighan Uyghurlar bügün yeni 15-séntebir peyshenbe kech sa'et 8 de, gollandiyening zeyst shehiridin, shwétsariyening jenwe shehirige qarap yolgha chiqti.

Shwétsariyening paytexti jenwege jaylashqan birleshken döletler teshkilati kishilik hoquq kéngishi merkizi binasi aldida élip bérilmaqchi bolghan namayish pa'aliyiti, xitay hökümitining mezkur komitétqa yene eza bolup kirishini tosush üchün uyushturulghan bolup, tibet erkinlik herikiti bilen dunya Uyghur qurultiyining hemkarliqida ötküzülidu.

Tibet erkinlik herikiti terep bilen dunya Uyghur qurultiyining hemkarliqida ilgirimu bir qanche qétim namayish teshkillinip, keng kölem we zor miqdarda adem seperwer qilin'ghanliqi we bu qétimliq namayishning ilgirikilerdin muhim dep qaralghanliqi xewer qilin'ghan idi.

Melum bolushiche؛ namayish waqtining yéqinlap kélishi bilen dunya Uyghur qurultiyining re'isi rabiye qadir xanim bu heqte mexsus bir widi'oluq chaqiriq qilghandin bashqa, bash katip dolqun eysa ependimu munasiwetlik döletlerdiki Uyghur aktiplirigha téléfon arqiliq yétekchilik qilghan idi.

Ziyaritimizni qobul qilghan dunya Uyghur qurultiyining bash katipi dolqun eysa ependi bu qétimqi namayishning tarixiy qimmiti we bügünki ehmiyitini bildürüsh bilen birge, tibet erkinlik herikiti tereptin namayish qilidighan adem sanining pewqul'adde yuqiri bolidighanliqi, uning üchün Uyghurlarning bu pursette yüksek bir pelle yaritish üchün hesse qoshushining zörürlükini yene bir qétim tekitlidi.

Igilishimizche, ilgiri firansiyede orunlashturulghan namayishqimu, gollandiyediki Uyghurlar bir aptobus bilen bérip kelgen idi. Bu qétimliq seperning omumiy musapisi ming kilométirdin artuq bolup, texminen on nechche sa'et yol yürülidiken. Pa'aliyet heqqidiki uchur we chaqiriqlar buningdin bir qanche hepte ilgiri élan qilin'ghan bolup, bu ariliqta gollandiyedin seperwer qilin'ghan Uyghurlar aldin tizimlitish arqiliq özlirining qizghinliqini ipadiligen.
Hazir bu pa'aliyetke gollandiye, gérmaniye, bélgiye we firansiye qatarliq döletlerdiki Uyghurlar seperwer qilin'ghan bolup, bélgiye Uyghur jem'iyitining mes'uli abdulmutellip ependining bildürüshiche, bélgiyedin ikki aptobus namayishchi yolgha chiqishqa hazir bolghan.

Bashqa döletlerdiki namayishchilarningmu teyyar bolghanliqi bilinmekte. Epsus, hazirche teyyarliq guruppisidikilerdin uchur alalmiduq. Emma, gollandiyediki Uyghurlardin shara'iti barlar bir aptobus bilen jenwege bérip kélishke rawurus hazirlandi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.