Җүнкун ширкити атуш йәрлик һөкүмәт даирилири билән бирлишип сәми нияз акиниң 25 мо йерини тартивалған

Уйғур елиниң җәнубий қисмида зор миқдардики йәрләрни игиливалған хитайниң җүнкун ширкити 2006 - йили атуш шәһириниң сүнтағ йезисидики деһқанларниң 500 мо йерини мәҗбури еливалиду. Атуш шәһәрлик йәрлик һөкүмәт даирилириниң бесими билән шоруқ кәнтидә олтурушлуқ сәми нияз акиниң 25 мо йериму ашу қетим мәҗбури тартивелиниду.

Техиму ечинишлиқ болғини шуки, җүнкүн ширкити униңға пәқәт 8 мо йәрниң һәққинила һесаблап аран 300 нәччә миң йвән пул бериду. Буниңға нарази болған сәми нияз ака һазирға қәдәр қизилсу области, уйғур аптоном районлуқ һөкүмәт органлири һәтта бейҗиңғичә әрз қилип бариду, лекин һечқандақ нәтиҗигә еришәлмәйду. Йәрлик даириләр икки қетим уни тутуп қамайду. Атуш шәһәрлик сақчи идариси дәсләп уни мәркәзгә әрзгә маңған сәпиридә тутуп 32 күн қамап қойиду. Сәми нияз ака буниңлиқ билән бу дәвадин ваз кәчмәйду.

2010 - Йили һөкүмәт даирилири уни йәр сетиш қәғизигә имза қоюшқа қистайду, у имза қоюшни рәт қилғанда бир кечидила пут қоллирини бағлап тутуп туруш орниға 10 күн қамап қойиду һәмдә мушу пурсәттин пайдиллинип униң өй - маканлирини чеқип, хитай ширкитиниң қурулуш селишиға өткүзүп бериду. Шуниңдин кейин у төт балиси билән аран 40 квадрат метир келидиған төвән капаләтлик өйдә яшашқа мәҗбур болиду.

Сәми нияз ака радиомиз зияритини қобул қилип, өзиниң нөвәттики әһвали вә өзи дуч кәлгән наһәқчиликләр һәққидә учур бәрди. У йәнә өзиниң йүрәк сөзлирини дуня җамаәтчиликигә аңлитиш арзусини билдүрди.

Йәр җайлиридин айрилған сәми нияз акиниң хитай һөкүмәт орунлириға қилған әрзи нәтиҗә бәрдиму йоқ? униң аилиси вә бала - чақилири һазир немигә тайинип күн өткүзиватиду? сәми нияз ака радийомиз арқилиқ дуня җамаәтчиликигә йәнә қандақ йүрәк сөзлирини ейтти? бу һәқтики программимизниң ахири давамлиқ диққитиңларда болиду.