Toronto shehiridiki xitay konsulxanisi aldida naraziliq namayishi ötküzüldi

Ixtiyariy muxbirimiz gülshen abduqadir
2016.10.03
Share on WhatsApp
Share on WhatsApp
kanada-5-iyul-namayish.jpg Kanadaliq Uyghurlar “5-Iyul qirghinchiliqi” munasiwiti bilen namayish ötküzdi. 2015-Yili 5-iyul.
RFA/Ruqiye

Dunya Uyghur qurultiyining chaqiriqigha asasen dunyaning herqaysi döletliride yashaydighan Uyghurlar her yili 1-öktebir küni özliri turushluq döletlerdiki xitay elchixanilirining aldigha yighilip, xitay hökümitige bolghan naraziliq namayishliri ötküzüp kelmekte.

Yillardikige oxshashla, kanadaning toronto shehiride yashaydighan Uyghurlar 1-öktebir küni torontodiki xitay konsulxanisi aldigha yighilip, naraziliq namayishi ötküzüp xitay hökümiti 67 yildin buyan yürgüzüwatqan assimilyatsiye siyasitining mahiyitini kanada xelqige anglatti.

Namayishta, namayishni teshkilligen sherqi türkistan sürgündiki hökümiti, medeniyet merkizining mu'awin re'isi adil naraziliq bayanatnamisini oqup ötti.

Bayanatnamide, “Uyghur xelqining bu qara künni hergiz estin chiqarmaydighanliqi, 1949-yili xitay hökümiti musteqil sherqi türkistan jumhuriyitini bésiwalghandin kéyin, siyasiy, medeniyet, til, din örp adet jehetlerde qattiq qol siyaset qollinish arqiliq nurghunlighan Uyghurlarni tutqun qilghanliqi, türmilerge tashlighanliqi we qattiq qiyin qistaqlarni élip barghanliqi”, netijide “ Bügünki sherqi türkistan üsti ochuq türmige aylinip qalghanliqi” otturigha qoyuldi.

Namayishqa qatnashqan abdul eziz ependi ziyaritimizni qobul qilip, özining dawamliq namayishqa qatniship kéliwatqanliqini bildürdi.

Her qétim torontoda ötküzülüp kéliwatqan namayishqa, iran ishghaliyiti astidiki jenubi ezerbeyjan azadliq partiyisining ezalirimu qatniship, özliri bilen teqdirdash bolghan Uyghur xelqining yénida turup keldi.

Shu künki namayishqa qatnashqan jenubi ezerbeyjan istiqlal partiyesining torontodiki wekili yashar bozkurt, jenubi ezerbeyjan istiqlal partiyesining ezaliridin oghuz we ata qatarliqlar ziyaritimizni, qobul qilip özlirining Uyghur xelqi bilen teqdirdash ikenlikini, her zaman Uyghurlarning yénida bolidighanliqini bildürdi.

Yashar bozkurt ependi mundaq dédi: “Uyghurlar xitay ishghaliyitide, biz ezerbeyjanliqlar iran ishghaliyitide yashap kéliwatimiz, biz Uyghurlar bilen teqdirdash. Biz her waqit Uyghurlarning yénida turimiz.”

Shu künki namayishqa kanadaning toronto shehiride yashawatqan tahir a'ilisi 3 oghli bilen birlikte qatnashqan bolup, ziyaritimizni qobul qilghan tahir ependi, özining bügün xitaygha bolghan naraziliqini keng-kushade anglitiwalghanliqi üchün intayin xushal ikenlikini bildürdi.

Shu künki namayishqa kanadagha kelginige emdila bir yil bolghan, bu yil 18 yashqa kirgen musteqil tuyghunmu qatnashqan bolup, u kanadagha kélip özining köz qarashlirini musteqil anglitish pursitige érishkenlikidin intayin memnunluqini bildürdi.

Namayishqa toronto shehiri we etrapida yashaydighan köp sanda kishi qatnashqan bolup, namayishchilar, “Uyghurlargha erkinlik, xitay wetinimizdin chiqip ket, xitay qirghinchiliqni toxtat, xitay térrorist ”dégen'ge oxshash sho'arlarni towlidi.

1-Öktebir shenbe küni ötküzülgen namayish, toronto waqti chüshtin kéyin sa'et 3 de bashlinip 5 etrapida axirlashti.

Bu programmining tepsilatini yuqiridiki ulinishtin anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet