Xelq'ara insan heqliri küni teywende élip bérilghan namayishqa Uyghur, tibet, mongghullarmu qatnashti

Ixtiyariy muxbirimiz haji qutluq qadiri
2016-12-12
Share
kishilik-hoquq-teywen-namayish.jpg Yaponiye Uyghur jem'iyitining re'isi ilham mahmut xelq'ara insan heqliri küni élip bérilghan namayish sözlimekte. 2016-Yili 10-dékabir, teywen.
RFA/Qutluq

10-Dékabir xelq'ara insan heqliri küni munasiwiti bilen teywenning teyjung shehiride ötküzülgen namayishqa teywende élip bériliwatqan kishilik hoquq pa'aliyetlirige ishtirak qiliwatqan Uyghur, tibet, mongghul wekillirimu qatnashqan.

Qedirlik radi'o anglighuchilar hazir anglawatqininglar teywenning teyjung shehiride 10-dékabir xelq'ara insan heqliri küni munasiwiti bilen élip bériliwatqan namayish.

Bügünki namayish teyjung sheherlik hökümetning qollishi astida kishilik hoquq teshkilatliri birlikte élip barghan namayish bolup, namayishqa yaponiye Uyghur jem'iyitining re'isi ilham mahmut, bash shtabi tokyodiki jenubiy mongghuliye qurultiyining bash katipi daychin, tibet teshkilatlirining wekilliri we xongkongluq démokratchilarmu ishtirak qildi.

Teywen teyjung sheherlik hökümet uzun buyan mezkur sheherde élip bériliwatqan türlük kishilik hoquq pa'aliyetlirini yéqindin qollap kéliwatqan bolup, ziyaritimizni qobul qilghan ilham mahmut bu heqte toxtaldi.

Namayish etigen sa'et onda teyjung dewr meydanidin bashlan'ghan bolup, namayishchilar teywen xelqining öz teqdirini özi belgilishini shundaqla xitaydiki kishilik hoquq mesililirining yaxshilinishi üchün teywenliklerning yéqindin yardemde bolushini telep qilip, bu heqte türlük sho'arlarni towlap, ikki sa'et etrapida teyjung sheher kochilirini aylinip dewr meydanigha yétip keldi.

Namayishning küntertipi boyiche, bu qétimqi namayishqa qatnashqan bir qisim kishilik hoquq pa'aliyetchiliri nöwet bilen sözge teklip qilindi.

Aldi bilen sözge chiqqan yaponiye Uyghur jem'iyitining re'isi ilham mexmut söz qilip, xitay kompartiyesining Uyghur élida yürgüzüwatqan nöwettiki basturush siyasiti toghrisida toxtilish bilen birge, özining teywen xelqining teywenning kelgüsi üchün otturigha qoyghan ulughwar ghayilirini hörmet qilidighanliqini we teywen xelqini Uyghur mesilisige yéqindin köngül bölüshke chaqiridighanliqini bildürdi.

Xongkongdin kelgen xitay démokratchilirining wekili söz qilip, nöwette xongkongda xitay kompartiyesi yolgha qoyuwatqan erkin saylam qanunidiki bezi bir siyasiy tüzümlerni xongkongda xelqining qet'iy qobul qilmaydighanliqini, teywenliklerning xongkong mesilisidin sawaq élip teywenning kelgüsini öz teqdirini özi belgilesh mizani boyiche bir terep qilishini ümid qilidighanliqini bayan qildi.

Tibet, mongghul wekillirimu arqa-arqidin söz qilip, nöwette öz tupraqlirida saqliniwatqan kishilik hoquq mesililiri toghrisida toxtaldi.

Ziyaritimizni qobul qilghan jenubiy mongghuliye qurultiyining bash katipi daychin:" Shexsen men özüm tunji qétim tibet, Uyghur, mongghullarning qatnishishi bilen teywende élip bérilghan bu namayishtin tolimu hayajanliniwatimen. Elwette, bizmu dewayimizni teywen xelqige anglitish, ularning hésdashliqini qolgha keltürüsh shundaqla teywenlikler bilen ortaq ghayimizni ishqa ashurush üchün bu xil pa'aliyetlerge köprek qatnishishimiz kérek dep oylaymen" dédi.

Namayishqa ishtirak qilghan teywenlik kishilik hoquq pa'aliyetchisi lin bügünki namayish heqqide toxtilip: " Xitay kompartiyesi teripidin kishilik hoquqliri ziyankeshlikke uchrighan tibet, mongghul, Uyghur qatarliq milletlerning wekillirimu namayishqa qatnashti. Biz bularning kishilik hoquqlirini qoghdash yolida elwette,ular bilen birlikte xitay kompartiyesige qarshi turimiz" dédi.

Ilham mahmut teywende élip bérilghan bu qétimqi namayishning Uyghur dawasidiki ehmiyiti heqqide toxtaldi.

Namayishtin kéyin dewr meydanida kishilik hoquq pa'aliyetlirini himaye qilghuchi bir qisim sen'etkarlar erkinlikke béghishlan'ghan sen'et nomurlirini namayan qildi.

Igilishimizche, teywende élip bériliwatqan Uyghur, tibet, mongghul wekillirining qatnishishidiki kishilik hoquq pa'aliyetliri mushu ayning 14-künige qeder dawam qilidiken.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.