“Xelq'ara kishilik hoquq küni” de Uyghur, tibet we xitaylar londonda namayish ötküzdi

“Xelq'ara kishilik hoquq küni” de Uyghur, tibet we xitaylar birlikte ötküzgen namayishtin körünüsh. 2017-Yili 10-dékabir, london.

“Xelq'ara kishilik hoquq küni” de Uyghur, tibet we xitaylar birlikte ötküzgen namayishtin körünüsh. 2017-Yili 10-dékabir, london.

En'gliyediki Uyghur, tibet we xitaylar 10‏-dékabirdiki “Xelq'ara kishilik hoquq küni” de londondiki xitay elchixanisi aldida namayish ötküzüp, xitay hökümitining künsayin nacharlishiwatqan kishilik hoquq xatirisige naraziliq bildürdi we shundaqla en'gliye bash ministiri térésa may xanimgha telep xéti sundi.

Namayishni en'gliyediki “Uyghur, tibet we xitay démokratliri hemkarlishish guruppisi” uyushturghan bolup, namayishchilar qollirida “Erkinlik, kishilik hoquq we démokratiye” dégen söz-ibariler yézilghan in'gliz, tibet, Uyghur we xitay tilliridiki lozunkilarni kötürgen halda xitay elchixanisining aldida sho'ar towlap namayish ötküzdi.

Namayishqa tibetlikler, bir qisim xitaylar we Uyghurlardin bolup 100 din artuq kishi qatnashqan. Biz neq meydan'gha téléfon qilip, namayishqa qatnashqan Uyghur pa'aliyetchi rexime mexmut xanim we kérem zahir ependiler bilen söhbet élip barduq.

Rexime mexmut xanim 10-dékabirdiki “Dunya kishilik hoquq küni” munasiwiti bilen en'gliyediki tibet, Uyghur we démokrat xitaylar birlikte londondiki xitay elchixanisi aldida namayish ötküzülgenlikini, namayishta her millettin ikkidin siyasiy mehbusning tonushturulghanliqini bayan qildi.

Rexime mexmut xanim namayishta Uyghur siyasiy mehbuslardin ilham toxti bilen gülmire iminni tonushturghanliqini ilgiri sürdi.

Igilinishiche, namayish jeryanida xitaydiki kishilik hoquq depsendichiliki toghrisida teyyarlan'ghan bir parche xet en'gliye bash ministiri térésa may xanimgha sunulghan we shu meydanda muxbirlargha bayanat bérilgen. Uyghur pa'aliyetchilerdin kérem zahir ependi 2 sa'et dawamlashqan bu namayishning londonda zor tesir peyda qilghanliqini bayan qildi.

En'gliyediki Uyghur, xitay we tibetlerdin terkib tapqan bu “Hemkarliq guruppisi” 8 yildin béri londonda köp qétim pa'aliyet élip barghan. Rexime mexmut xanimning tekitlishiche, bu yilqi namayishning burunqigha oxshimaydighan alahide terepliri bar iken.

En'gliyediki “Uyghur, tibet we xitay démokratliri hemkarlishish guruppisi”buningdin 8 yil ilgiri londonda qurulghan bolup, her yili 10-dékabir “Dunya kishilik hoquq küni” de birleshme namayish ötküzüp kelmektiken. Ular yene xitay dölet rehberliri en'gliyege ziyaretke kelgende yaki xitay terep londonda chong pa'aliyetlerni uyushturghanda xitaygha qarshi birleshme namayishlarni teshkillep kelmektiken.