London we oslo shehiridiki xitay elchixanisi aldida naraziliq namayishi ötküzüldi

Ixtiyariy muxbirimiz erkin tarim
2019-02-05
Élxet
Pikir
Share
Print
5-Féwral küni "Ghulja weqesi" ning 22 yilliqini xatirilesh, shundaqla xitay hökümitining Uyghurlargha élip bériwatqan éghir bésim siyasitige naraziliq bildürüsh üchün xitay elchixanisining aldida ötküzülgen namayishtin körünüsh. 2019-Yili 5-féwral, oslo.
5-Féwral küni "Ghulja weqesi" ning 22 yilliqini xatirilesh, shundaqla xitay hökümitining Uyghurlargha élip bériwatqan éghir bésim siyasitige naraziliq bildürüsh üchün xitay elchixanisining aldida ötküzülgen namayishtin körünüsh. 2019-Yili 5-féwral, oslo.
RFA/Erkin Tarim

5-Féwral küni "Ghulja weqesi" ning 22-yilliqini xatirilesh, shundaqla xitay hökümitining Uyghurlargha élip bériwatqan éghir bésim siyasitige naraziliq bildürüsh üchün en'gliyening paytexti london bilen norwégiyening paytexti oslodiki xitay elchixanisining aldida namayish ötküzüldi.

Merkizi gérmaniyening köln shehiride bolghan "Milliy görüsh", yeni "Milliy köz qarash" teshkilati d u q bilen hemkarliship, 2-féwraldin bashlap yawropa döletliri, awstraliye, shimaliy amérika qit'eliride xitayning Uyghurlar üstidin yürgüzüwatqan zulumlirigha, jaza lagérlirigha qarshi namayish teshkillidi. Bügün "Milliy görüsh" teshkilati bilen norwégiye Uyghur komitéti birlikte xitayning osloda turushluq elchixanisining aldida namayish ötküzgen. Namayishqa "Milliy köz qarash" teshkilatining oslo shöbisining mes'uli memet temel ependi, d u q rehberliri, norwégiye Uyghur komitétining mes'ulliri we Uyghurlardin bolup 150 etrapida kishi ishtirak qilghan.

"Milliy görüsh", yeni "Milliy köz qarash" teshkilatining oslo shöbisining mes'uli memet temel ependi namayish meydanidin ziyaritimizni qobul qilip, namayishni uyushturushtiki meqsitining Uyghurlarning hazirqi éghir weziyitini dunya jama'etchilikige anglitish ikenlikini bayan qilip mundaq dédi: "Bügün milliy görüsh teshkilatining oslo shöbisi ezaliri bolush süpitimiz bilen norwégiyening paytexti oslodiki xitay elchixanisining aldida namayish qilip turuptimiz. Sherqiy türkistanliq qérindashlirimiz bilen birlikte namayish qiliwatimiz. Hemmimizge melum bolghinidek xitayning bésimi 40-50 yildin buyan dawamlashmaqta. Sherqiy türkistanliqlarning milliti we dini xitaygha oxshimighachqa assimilyatsiyege uchrimaqta. Bügünki kün'ge kelgende xitay zulumi chidighusiz halgha keldi. Biz xitayning bu siyasitige naraziliq bildürüsh we dunyagha anglitish üchün bügün namayish qiliwatimiz".

5-Féwral küni norwégiyening paytexti osloda élip bérilghan namayish toghrisida téximu tepsiliy melumat igilesh üchün norwégiye Uyghur komitéti re'isi bextiyar ependi bilenmu télédon söhbiti élip barduq. U, namayish toghrisida melumat berdi.

Namayishqa qatnashqan Uyghur pa'aliyetchi patigül ghopur xanim hawaning nahayiti soghuq bolushigha qarimay, köp kishining qatnashqanliqini bayan qildi.

5-Féwral küni en'gliyening paytexti londondiki xitay elchixanisining aldidimu "5-Féwral ghulja weqesini xatirilesh shundaqla xitayning hazir türkiy xelqlerge élip bériwatqan heddidin tashqiri bésim siyasitige naraziliq bildürüsh üchün namayish élip bérilghan. En'gliye Uyghur jem'iyiti mu'awin re'isi kerem zahir ependi namayish heqqide melumat berdi.

Kerem zahir ependi bu qétimqi namayishqa, Uyghur, türk, tatar, in'glizlardin bolup 120 etrapida kishi qatnashqanliqini bayan qildi.

Uyghur ziyaliysi eziz eysaning éytishiche bu qétimqi namayishqa bezi in'gliz siyasetchilermu qatniship söz qilghan. Eziz eysa ependi bu heqte toxtaldi.

Namayishchilar ay-yultuzluq kök bayraq we türlük teshwiqat lozunkilirini kötürüshüp, jarangliq sho'arlar bilen xitay hakimiyitige bolghan naraziliqlirini ipade qilish bilen birge teshwiqat wasitiliri arqiliq shu döletlerning rehberlirini xitaygha bésim ishlitip, bésimni toxtitishqa chaqirghan. Lozunkilargha kishiler "Xitay Uyghurlarni tutushni toxtatsun, xitay jaza lagérlirini taqisun, Uyghurlargha erkinlik, sherqiy türkistan'gha musteqilliq" dégendek sho'arlar yézilghan.

Toluq bet