Dubeydiki tutqunning ayali: yoldishim jéngjudiki aliy mektep oqushini tashlashqa mejbur bolghan

Muxbirimiz shöhret hoshur
2017-11-13
Élxet
Pikir
Share
Print
Huseyin imintoxtining pasporti (ayali teminligen).
Huseyin imintoxtining pasporti (ayali teminligen).
RFA

Muxbirimiz bügün, ötken ayda dubeyde siyasiy panahliq tilewatqan mezgilide tutqun qilin'ghan Uyghur muhajir hüseyin imintoxtining ehwali heqqide xelq'ara organlardin melumat soridi.

B d t ning, panahliq ishlirigha alaqidar komitétining ottura sherq mes'uli bilen ereb birleshme xelipilikining washin'gton elchixanisi, mezkur ehwalgha alaqidar so'allargha xitayning dubeydiki konsulxanisi jawab bérishi kéreklikini bayan qildi. Bügün hüseyin imintoxti heqqide igilep melumat bergen ayali, uning eslide jéngjudiki bir tébabet uniwérsitétining oqughuchisi ikenliki, xitay salghan awarichilik we tehdit sewebidin oqushini tashlap türkiyege chiqqanliqini eskertti.

Biz aldi bilen b d t panahlan'ghuchilar ishxanisining xelq'araliq alaqe xadimi William Spindler bilen alaqileshtuq. U mezkur ehwalgha b d t panahliq ishxanisining ottura sherq bayanatchisi Mohammed ABU ASAKER bilen sözlishishimizni tewsiye qildi. Muhemmed asikar ependi bolsa, ehwalning tepsilatini anglighandin kéyin, öz ishxanisining bu xil délolargha alaqidar uchurlarni axbaratchilar bilen ortaqlishalmaydighanliqini éytti. U bu ehwal heqqide melumat béreleydighan orunning ereb birleshme xelipilikining washin'gton elchixanisi ikenlikini éytti.

Biz mezkur elchixana xadimigha, hüseyin imintoxti isimlik bir panahlan'ghuchining b d t da panahliq tilewatqan mezgilide tutulghanliqi, uning aqiwiti heqqide a'ile-tawabi'atining bügün'giche héchqandaq uchur alalmaywatqanliqini melum qilduq. U özining bundaq bir ehwaldin pütünley xewersiz ikenlikini éytti, u bu heqte uchurgha ige we jawab bérishke tégishlik orunning xitayning ereb birleshme xelipilikidiki elchixanisi ikenlikini éytti.

Xitayning ereb birleshme xelipilikining téléfoni-xizmet sirti waqitqa toghra kelgenlikidin bolsa kérek-élinmidi.

Biz bügün yene tutqun hüseyin imintoxtining ayali bilen hüseyinning chet'elge chiqishtin burunqi ehwali heqqide melumat soriduq. U hüseyin'ge xitay da'iriliri kéliwatqan awarichilikning u uniwérsitétta oquwatqan mezgilde bashlan'ghanliqini éytti.

Uning déyishiche u eslide jéngjudiki bir tébabet uniwérsitétida oquwatqan bolup, u oqush mezgilide Uyghur rayonidin kelgen saqchilarning birnechche ret soraq qilishigha duch kelgen. Soraqlarda uning burun xotendiki mezgilide diniy telim alghanliqi we besh waq namaz oquwatqanliqi téma bolghan. Uning üstige shu mezgilde özige oxshash pikir we héssiyattiki bir nechche dostining ushtumtut ghayib bolushi uni oz teqdiri heqqide endishige salghan. Shunga oqush püttüridighan'gha yene ikki yil qalghanda oqushni tashlighan we türkiyege seper qilghan.

Yuqiridiki awaz ulinishidin, dubeydiki tutqun hüseyin imintoxti heqqidiki söhbetning tepsilatini anglighaysiler.

Toluq bet