Mustafa yigit: Uyghurlar musulman we türkiy xelq bolghachqa zulumgha uchrimaqta

Türkiyening ottura rayonigha jaylashqan afyon wilayitide “Sherqiy türkistan we kerkük mesilisi” témisida yighin chaqirildi. Afyonqarahisar yashlar munbiri teripidin chaqirilghan yighin türkiyening azadliq marshi bilen bashlandi.

Afyonqarahisar yashlar munbirining mes'uli memet öz ependi échilish nutqida, bu xil yighinni chaqirishtiki meqsitining afyon xelqige ata wetini sherqiy türkistan heqqide melumat bérish we ulargha meniwi jehettinmu bolsa yardem bérish ikenlikini tekitligen. Arqidin mutexessisler iraq türkmenliri, afghanistandiki türkiy milletler we Uyghurlar toghrisida doklat bergen. Afghanistandiki özbéklerning rehbiri rashit dostumning oghlimu söz qilghan.

Bu yighinda, mustafa yigit ependi “Yalghuzluqqa tashliwétilgen ata wetinimiz sherqiy türkistan” témisida söz qilghan. U doklatida: türklerning ata wetini we islam dinining böshüki bolghan sherqiy türkistandiki Uyghurlarning zulumgha uchrishishi ularning musulman we türk bolghanliqidin ibaret ikenlikini ilgiri sürgen.

4 Yil tajikistanda oqutquchiliq qilghan, oqughuchiliq yilliridin bashlap Uyghur mesilisige qiziqip kéliwatqan mustafa yigit ependi, türklerning ata wetini, türklerning tunji bolup islam dini bilen nurlan'ghan jayi sherqiy türkistanning hazir xitayning ishghali astida ikenlikini, Uyghur türklirining éghir bésim astida ikenlikini, türk hökümitining Uyghurlargha ige chiqishi kéreklikini éytqan.

Bu yighin'gha sabiq parlamént ezasi mexmut qochaq ependimu qatnashqan bolup, u öz sözide türk yashlirining sherqiy türkistan mesilisige köngül bölüshi kéreklikini tekitligen.

“Qojatepe.Xewer” tor békitide élan qilin'ghan xewerge asaslan'ghanda 26-iyul küni kech afyonqarahisardiki yasemin zalida ötküzülgen bu yighinda, türkiye hökümitining ereb döletliri bilen bolup kétip sherqiy türkistan we kerkük mesililirige yéterlik derijide köngül bölmeywatqanliqini, eslide mezkur mesililerning türkiyening milliy mesilisi bolushi kérekliki tekitlen'gen.

5-Iyul ürümchi weqesidin kéyin Uyghurlar toghrisida chaqirilghan bu xil yighinlarning sani barghanséri köpeymekte. Bu xil doklat bérish yighinlirining Uyghur dewasigha qandaq tesiri bolar? bu xil yighinlargha türklerning köplep qatnishishi némining alamiti? dégen'ge oxshash so'allargha jawab tépish üchün sherqiy türkistan weqpining sabiq bash katipi hamut göktürk ependige mikrofonimizni uzattuq. U, bu xil doklat bérish yighinining sherqiy türkistan dewasini türkiyening milliy dewasigha aylandurush üchün intayin ehmiyetlik ikenlikini bayan qilip ötti.