Mutellip iminning murajet xétidin kéyin da'iriler adem ewetip mutellip iminni izdidi

Muxbirimiz méhriban
2013-11-15
Élxet
Pikir
Share
Print
Qaghiliq xitay chégra mudapi'e etriti.
Qaghiliq xitay chégra mudapi'e etriti.
tianshannet.com.cn


15 - Iyul seherde béyjing ayrodromida saqchilar teripidin mejburiy élip kétilgen, istanbul uniwérsitétining aspérant oqughuchisi mutellip imin, ürümchidiki melum méhmanxanida 72 kün qanunsiz tutup turulup soraq qilin'ghandin kéyin, 1 - öktebir üyige qayturulghan.

Emma u, kimliki we pasporti tartiwélinip, öyige qayturulghandin kéyinmu dawamliq saqchilarning nazariti astida yashashqa mejbur bolghan. Mutellip imin bu ehwallar heqqide Uyghurbiz torida ochuq xet élan qilip jem'iyetke murajet qilghandin kéyin,da'iriler10 - we 11 - noyabir künliri mutellip iminni izdep kélip, uning türkiyige qaytip oqushigha asanliq tughdurup béridighanliqini, emma ular bilen hemkarlishishi kéreklikini shert qilghan. Diqqitinglar muxbirimiz méhriban igiligen bu heqtiki tepsiliy melumatlarda bolsun.

Da'iriler teripidin 72 kün qanunsiz tutup turulup soraq qilin'ghandin kéyin, xotendiki öyige nezerbend qilin'ghan istanbul uniwérsitétining magistér aspéranti mutellip imin, yéqinda xitay dölet bixeterlik xadimlirining uni yene izdep kelgenlikini bildürdi.

15 - Iyul seherde, istanbulgha qaytip oqush sepiridin tosup qélin'ghan mutellip imin 12 - noyabir küni Uyghurbiz torigha bergen uchurida, 10 - ,11 - noyabir künliri özlirini diniy ishlar idarisidin dep tonushturghan xitay dölet bixeterlik xadimlirining xotendiki öyige izdep kélip, uning türkiyige qaytip oqushigha asanliq tughdurup béridighanliqini, emma ular bilen hemkarlishishi kéreklikini shert qilghanliqini bildürgen.

Kimliki we pasporti tartiwélinip, sirtqa chiqip erkin pa'aliyet qilishtin mehrum qilin'ghan mutellip iminning Uyghurbiz tori muxbirigha bildürüshiche, 10 - we 11 - noyabir künliri özlirini xoten wilayetlik diniy ishlar bashqarmisidin dep atiwalghan ikki xadim u turushluq mehellige izdep kelgen. Ular10 - noyabir küni 1 - qétim kelginide mutellip imin olturushluq mehellining kent ahaliler komitétigha kirip mutellip imin bilen körüshüsh arzusini bildürgen.

Etisi shu yer waqti etigen sa'et 9 din 17 ötkende özini ablajan dep atiwalghan bireylen mutellipning öyige téléfon qilip, uning bilen körüshidighanliqini éytqan. Mutellip uning bilen öyining etrapida körüshüshni telep qilghandin kéyin, ular aptomobil bilen mutellipning öyining etrapigha kelgen we mutellip bilen aptomobil ichide sözlishidighanliqini éytqan. Mutellip özi xalimighan bolsimu, aptomobilgha chiqqan we arqa orunduqta yene bir xitay ayalningmu olturghanliqini körgendin kéyin, ularning kimlikini sorighan. Özini ablajan dep tonushturghan xadim özining wilayetlik bixeterlik idarisida ishleydighanliqini éytqandin kéyin, mutellipning ehwalini igileshke kelgenlikini we mutellipke yardem béridighanliqini bildürgen.

Mutellip imin Uyghur biz torigha bergen bayanida, özini xoten wilayetlik dölet bixeterlik idarisining xadimi dep tonushturghan ablajan isimlik bu kishi bilen bolghan söhbet jeryanini élan qilghan bolup,xitay dölet bixeterlik idarisining özini ablajan dep tonushturghan bu xadimi, mutellip imindin uning istanbul sepiridin tutup qélin'ghandin buyanqi barliq ehwallarni inchikilik bilen sürüshtürgen, andin mutellip iminning kona kimlikining kopiyesini élip béyjinggha bérip, yéngidin kimlik béjirishke iltimas qilsa bolidighanliqini tewsiye qilghan. Mutellip özining kimliksiz seperge chiqalmaydighanliqini bildürgendin kéyin, u köyün'gen qiyapette mutellipke nesihet qilip, eger bundin kéyin tor béketlirige özining ehwali heqqide uchur yollap erz qilishni toxtatsila, özining kimliki we pasportini qayturuwélishigha yardemde bolidighanliqini bildürgen. Bu dölet bixeterlik xadimi yene, mutellipning türkiyidiki mektepke oqushqa iltimas qilish jeryanini tepsiliy sürüshtürüp, uning qaysi orunning oqush mukapatigha iltimas qilghanliqini xatiriliwalghan we 3 kün'giche mutellipni yene izdeydighanliqini we mutellipning pasporti hem kimlikini munasiwetlik saqchilardin sürüshtüridighanliqini wede qilghan.

Melum bolushiche, yéqinqi birnechche aydin buyan, biyjing milletler uniwérsitétida oquwatqan yaki ilgiri bu mektepte oqughan birqanche neper Uyghur oqughuchi saqchilar teripidin tutup qilinip soraq qilinish yaki "Söhbetlishish", "Chay ichish" qatarliq bahanilerde xitay dölet amanliqini qoghdash xadimliri yaki dölet bixeterlik xadimliri teripidin soraq qilishlargha duch kelgen. Bu oqughuchilarning bildürüshiche, saqchilar soraq jeryanida ulardin nuqtiliq halda ilham toxtini, ilham toxti bilen yéqin ötidighan kishilerni we ilham toxti sahipliqidiki Uyghurbiz torigha munasiwetlik ehwallarni sürüshtürgen.

Istanbul uniwérsitétining magistér aspirantliqida oquwatqan mutellip imin, ilgiri merkizi milletler uniwérsitétining én'gliz tili kespide oqughan bolup, u béyjingda oquwatqan ilham toxtining léksiyelirini anglighan we Uyghurbiz torida bir mezgil pida'iy terjiman bolup ishligen. Mutellip imin bundin ilgiri Uyghurbiz torida élan qilghan ochuq xétide saqchi da'irilirining uningdin ilham toxti mu'ellimge we Uyghurbiz torigha munasiwetlik ehwallarni sorighanliqini bildürgen idi.

Toluq bet