Nijat semetning saqchi zorawanliqigha uchrishi etraptiki ishlemchilerni heriketke keltürgen

Muxbirimiz shöhret hoshur
2014-03-28
Élxet
Pikir
Share
Print
Xitay hökümet saqchiliri xoten kochilirida
Xitay hökümet saqchiliri xoten kochilirida
AFP


Nijat semetning alahide saqchi zorawanliqigha uchrash weqesi heqqide radi'omizgha kelgen inkasta, nijatning qattiq urulushigha taqet qilip turalmighan neq meydandiki xotendin kelgen ishlemchilerning alahide saqchilarni qorshawgha élip edipini bergenliki we alahide saqchilarning meydandin qachqanliqi, saqchilarning arqidin küch toplap kélip xotenlik ishchilardin 30 nechche kishini tutqun qilghanliqi bayan qilin'ghan idi.

Emma nijatning a'ilisi weqening bu teripidin xewersiz ikenlikini bildürgen we nijatning téxi teltöküs ésige kelmigenlikini eskertken idi. Muxbirimizning bügün atushtiki 2 - saqchixanidin igilishiche, alahide saqchilar özliri urghan nijat semetni neq meydanda yeni ishlemchiler bazirida tutalmastin, ikkinchi saqchixana aldida kütüp turghan we aldigha chaqirtip ekilip tutqun qilghan. Bu uchur xotenlik ishlemchiler bilen alahide saqchilar arisidiki toqunushning rastliqini ispatliqmaqta.

Töwende muxbirimiz shöhret hoshurning bu heqte teyyarlighan programmisini anglaysiler.

Biz weqening xotendin kelgen ishlemchilerge alaqidar qismini éniqlap béqish üchün, urup yarilandurulghan nijat semetning dadisidin melumat soriduq:

So'al: anglisaq, shu küni weqe yüz bergen meydanda xotenlik ishlemchiler bar iken, bu ishlemchiler sizning oghlingizning qattiq urulushigha taqet qilalmay weqege arilishiptu, buningdin xewiringiz boldimu?

Jawab: yaq, uningdin xewirim bolmidi, chünki balam téxi toluq ésige kelmidi. Emma shu ishchilardin birqanchisini tutup kétiptu dep anglidim.

Biz bügün weqening jeryani heqqide yenimu tepsiliy melumat élish üchün, nijat semet tutulghan 2 - saqchixanidin melumat soriduq:

So'al: nijat semetning ehwali qandaq hazir?

Jawab: qaysi nijat semet?

So'al: saqchilar teripidin urup yarilandurulghan, nöwette oblastliq doxturxanida dawaliniwatqan?

Jawab: u ish alahide saqchilar bilen bolghan ish, biz bilen alaqisi yoq.

So'al: nijat semetni dadisining silerning saqchixanigha ekelgini rastmu?

Jawab: rast. Mushu saqchixanidin tutup eketti.

So'al: weqening jeryani qandaq iken?

Jawab: alahide saqchilar tekshürüsh élip bériwatsa maslashmighan hem alahide saqchilarni urup qéchip ketken ish dep angliduq, emma teltöküs xewirimiz yoq, chünki weqe yüz bergen jay bizning tewelik emes.

So'al: alahide saqchilar néme üchün neq meydanda tutmay, silerning saqchixanining aldida tutidu?

Jawab: ular hajet qilish üchün bizning saqchixanigha kirgen, adette hemmimiz qanun saheside bolghandikin, oburni yiraqta bolup qalghan ehwalda mushundaq saqchixanilargha kirip hajet qilinidu.

So'al: siler nijat semetni saqchixanigha chaqirtip ekep béripsiler, shundaqmu?

Jawab: biz chaqirmiduq, bular özliri munasiwetlik kishiler arqiliq dadisigha tél qilip, biz mushu saqchixanigha ekel dégen gep.

So'al: alahide saqchilar, néme üchün nijat semetni neq meydanda tutmastin, silerning saqchixanining aldida tutidu?

Jawab: nijat urup bolup deslepte motsékilit bilen, kéyin motsékilitni tashlap qachqan dep angliduq. Ishning tepsilatini 1 - saqchixana bilidu.

Hörmetlik radi'o anglighuchilar, melum bolushiche deslep weqe yüz bergende alahide saqchilarning sani 8 neper. Undaqta, nijat semet ularning qolidin qandaq qéchip qutulalighan? alahide saqchilar nijat semetni neq meydanda tutmastin, néme üchün 2 - saqchixanining aldida tutidu? mana buningdin qarighanda, nijat semetning qattiq urulghinini körgen xotenlik ishlemchilerning weqege arilashqanliqi, saqchilarning nijat semetni tutushqa neq meydanda charisiz qalghanliqi ashkarilanmaqta. Alahide saqchilarning nijat semetni ishxanisigha apirip chala ölük halitige kelgiche qattiq urushi ularning xotenlik ishchilar teripidin xéli qattiq edibini yégenlik éhtimalliqini otturigha chiqarmaqta.

Toluq bet