Ömer Uyghur wexpi pakistanda asiye kérim we balilirini qutquzush üchün heriketke ötti

Pakistanda qéyin'akilirining zorawanliqi we tehditi sewebidin yurtigha qaytalmaywatqan we pishawurdiki öyidin sirtqa chiqalmaywatqan asiye kérim we uning 4 balisini xeterlik ehwaldin qutuldurush üchün pakistan rawalpindida pa'aliyet élip bériwatqan ömer Uyghur wexpi heriketke ötti. Melum bolushiche, teshkilat bashliqi ömerjan 4 kündin buyan mezkur ish toghriliq rawalpindi bilen pishawur arsida qatnimaqta. Ömerjan aldinqi küni inisi we 3 pakistanliq dosti bilen birlikte asiye kérim qamilip turghan mehellige barghan. Mehelle jama'iti bulargha mezkur a'ilining xuy - peylining biraz yamanliqini eskertip, ishning biwaste sözlishish bilen hel bolmaydighanliqini we ishqa saqchilar arqiliq arilishishi kéreklikini éytqan. Ehwaldin xewer tapqan pishawur saqchiliri asiyening ehwaligha hésdashliqini bildürgen we birnechche kün ichide ehwalida yaxshilinish bolmisa yeni öydin sirtqa chiqalmasliqi yene dawamlashsa, saqchilarning öyige bésip kirip asiye we balilirini qutquzidighanliqini bildürgen.

Hörmetlik radiyo anglighuchilar, biz aldinqi küni pakistanliqqa tekken asiye kérimning yoldshining jinayet ötküzüp ürümchide türmige tashlan'ghanliqi, özining we balilirining yurti korligha qaytip kétishige qéyin'akilirining yol qoymaywatqanliqi we sewebtin ötken hepte chiqqan majirada asiye kérimning tayaq zerbisidin éghir yarilan'ghanliqi we qéyin'akilirining tehditi sewebidin öydin talagha chiqalmaywatqanliqi heqqide xewer bergen iduq.

Asiyening bayan qilishiche, asiye we balilirigha xitay elchixanisi ige chiqmighandin kéyin, pakistanda pa'aliyet élip bériwatqan ömer Uyghur wexpi weqege arilashqan. Teshkilat bashliqi ömerjan deslepte pishawurdiki dostliri arqiliq mezkur a'ile bilen yeni asiyening qéyin'akiliri bilen alaqilishishke tirishqan bolsimu, ular bu bir a'ile ishi ikenlikini eskertip bashqilarning arilishishini ret qilghan. Arqidin ömerjan rawalpindidiki özining inisi we 3 pakistanliq dostini élip mezkur a'ile bilen söhbetlishish üchün asiye kérim qamilip turuwatqan mehellige barghan. Ular mezkur a'ile bilen sözlishish pursitige yene érishelmigendin kéyin, pishawur saqchilirigha ehwalni melum qilghan we ularning hésdashliqi we himayisige érishken, emma saqchilar mezkur a'ilining emeliy ehwalini nezerde tutup, asiyeni qutuldurushqa derhal heriket qilmasliq, saqchixanida yéterlik derijide xadimlar toplan'ghan küni yeni yéqin birqanche kün ichide mezkur öyge bésip kirip asiye we balilirini qutquzush pilanini otturigha qoyghan.

Nöwette asiyening öz öyige qamilip qélish weziyiti yene dawam qilmaqta.