Ослода уйғур яшлирини тәрбийиләш курси, намайиш һәм норуз паалийити өткүзүлиду

Ихтиярий мухбиримиз әкрәм
2018-03-08
Елхәт
Пикир
Share
Принт
Норвегийәниң осло шәһиридә өткүзүлидиған 14-нөвәтлик уйғур яшлирини тәрбийиләш курсиниң логоси.
Норвегийәниң осло шәһиридә өткүзүлидиған 14-нөвәтлик уйғур яшлирини тәрбийиләш курсиниң логоси.
RFA/Ekrem

Д у қ вә норвегийә уйғур комитети тәминлигән учурларға асасланғанда, 14-нөвәтлик уйғур яшлирини демократийә, кишилик һоқуқ һәм қануний билимлири билән тәрбийиләш курси 16-мартен 18-мартқичә 3 күн норвегийәниң осло шәһиридә өткүзүлидиған болуп, курсниң тәйярлиқ хизмәтлири асасән тамамланған. Бу курстин бир күн илгири, йәни 15-март күни, «бир аваз бир қәдәм» шоари астидики уйғур аяллириниң намайиши болуп өтидикән. 18-Март кәчтә йәнә ослода норуз паалийити өткүзүлидикән.

Д у қ муавин рәиси пәрһат муһәммиди әпәндиниң тилға елишичә, 14-нөвәтлик уйғур яшлирини тәрбийиләш курси норвегийәдики миллий дәваниң тәрәққиятиға һәссиләр қетиш ролини ойнайдикән.

14-Нөвәтлик уйғур яшлирини тәрбийиләш курсини америка демократийини илгири сүрүш фонди җәмийитиниң маддий ярдими билән д у қ, рафто фонди җәмийити, норвегийә уйғур комитети бирликтә уюштурған болуп, д у қ 2007-йилидин буян өткүзүп кәлгән уйғур рәһбәрлирини тәрбийиләш программисиниң давами болуп һесаблинидикән. Алдинқи йиллири бу хилдики курс ситокһолм, берлин, бирюссел, җәнвә, денһаг, сидней, токйо, вашингтон қатарлиқ шәһәрләрдә өткүзүлгән. 

Норвегийә уйғур комитетиниң рәиси бәхтияр өмәр әпәнди бу һәқтә тохталғанда, ослода бу қетим өткүзүлидиған яшларни тәрбийиләш курсиниң тәйярлиқ хизмәтлири оңушлуқ тамамлиниш билән, 18-март кәч өткүзүлидиған норуз паалийитиниң һазирлиқлириниң давам қиливатқанлиқини әскәртти. 

Д у қ ниң тор сәһиписидә бу хусуста 9-феврал елан қилинған уқтурушида баян қилинишичә, бу қетимқи уйғур яшлирини тәрбийиләш курси икки басқучқа бөлүнгән һалда елип берилидикән. Биринчи күни, йәни 16-март күни нобел әркинлик сарийида уйғур елиниң күнсери яманлишиватқан вәзийитидин мәлумат бериш үчүн илмий муһакимә йиғини өткүзүлидикән. юмилақ үстәл сөһбити шәклидики бу йиғинға америка, канада, германийә қатарлиқ әлләрдин кәлгән д у қ рәһбәрлири, норвегийәдики курсқа иштирак қилидиған уйғур яшлири, норвегийә вә явропаниң бирқисим әллиридин кәлгән кишилик һоқуқ паалийәтчилири, явропадики уйғур мәсилиси мутәхәссислири, рафто фонди җәмийити вәкиллири һәмдә норвегийә парламентиниң бир қисим әзалири қатнишидикән. Иккинчи күнидин башлап яшларни тәрбийиләш курси давам қилидикән. Курс ахирлашқан 18-март күни кәчтә норуз паалийити болидикән.

Норвегийә уйғур комитети рәһбәрлиридин хәлчәм ханимму бу тоғрилиқ зияритимизни қобул қилғанда, норвегийәдики уйғурларниң бу икки паалийәткә әстайидил муамилә билән тәйярлиқ қилғанлиқини тәкитлиди.

Д у қ иҗраийә комитети муавин рәиси сәмәт абла әпәндиниң билдүрүшичә, уйғур яшлирини кишилик һоқуқ, демократийә, қануний билимләр билән тәрбийиләш курси норвегийәдики уйғур яшлириниң миллий роһини урғутушқа, хәлқаралиқ сәвийидә паалийәт елип беришиға түрткә болидикән. 

Д у қ ниң бу курс һәққидики уқтурушида «болупму, бу йиғинниң хитай даирилириниң шәрқий түркистанда уйғурларға йүргүзүватқан зулуми тарихта мисли көрүлмигән дәриҗидә күчәйгән мушундақ бир вәзийәттә өткүзүлүши, норвегийәдә яшаватқан уйғур тәшкилати вә милләтниң тәқдиригә көңүл бөлидиған барчә вәтәндашлиримизниң болуватқан зулумни норвегийә хәлқигә, мунасивәтлик кишилик һоқуқ тәшкилатлириға, норвегийә һөкүмитигә аңлитиш хизмәтлириниң техиму үнүмлүк елип берилишини илгири сүрүштә зор әһмийәткә игә» дейилгән. 

Норвегийә уйғур комитетиниң рәиси бәхтияр өмәр әпәнди зияритимиз әснасида, уйғур яшлирини тәрбийиләш курсиниң норвегийәдә өткүзүлүшиниң әһмийити һәққидә тохталди. Д у қ иҗраийә комитети муавин рәиси сәмәт абла әпәндиму бу һәқтә өз қарашлирини баян қилип өтти. 

Игилишимизчә, норвегийә уйғур комитетиниң тәшкиллиши билән 15-март күни ослода аяллар намайиши өткүзүлидиған болуп, уйғур яшларни тәрбийиләш курсидин бир күн бурун болидиған «бир аваз, бир қәдәм» шоари астидики бу намайишқа ослодики аяллардин башқа, һәрқайси әлләрдин кәлгән д у қ рәһбәрлири вә норвегийәдики башқа уйғур җамаитиму қатнишидикән.

Пикирләр (0)
Share
Толуқ бәт