Osloda Uyghur yashlirini terbiyilesh kursi, namayish hem noruz pa'aliyiti ötküzülidu

Ixtiyariy muxbirimiz ekrem
2018.03.08
DUQ-uyghur-yashlirini-terbiyelesh-kursi-2018.jpg Norwégiyening oslo shehiride ötküzülidighan 14-nöwetlik Uyghur yashlirini terbiyilesh kursining logosi.
RFA/Ekrem

D u q we norwégiye Uyghur komitéti teminligen uchurlargha asaslan'ghanda, 14-nöwetlik Uyghur yashlirini démokratiye, kishilik hoquq hem qanuniy bilimliri bilen terbiyilesh kursi 16-martén 18-martqiche 3 kün norwégiyening oslo shehiride ötküzülidighan bolup, kursning teyyarliq xizmetliri asasen tamamlan'ghan. Bu kurstin bir kün ilgiri, yeni 15-mart küni, “Bir awaz bir qedem” sho'ari astidiki Uyghur ayallirining namayishi bolup ötidiken. 18-Mart kechte yene osloda noruz pa'aliyiti ötküzülidiken.

D u q mu'awin re'isi perhat muhemmidi ependining tilgha élishiche, 14-nöwetlik Uyghur yashlirini terbiyilesh kursi norwégiyediki milliy dewaning tereqqiyatigha hessiler qétish rolini oynaydiken.

14-Nöwetlik Uyghur yashlirini terbiyilesh kursini amérika démokratiyini ilgiri sürüsh fondi jem'iyitining maddiy yardimi bilen d u q, rafto fondi jem'iyiti, norwégiye Uyghur komitéti birlikte uyushturghan bolup, d u q 2007-yilidin buyan ötküzüp kelgen Uyghur rehberlirini terbiyilesh programmisining dawami bolup hésablinidiken. Aldinqi yilliri bu xildiki kurs sitokholm, bérlin, biryussél, jenwe, dénhag, sidnéy, tokyo, washin'gton qatarliq sheherlerde ötküzülgen. 

Norwégiye Uyghur komitétining re'isi bextiyar ömer ependi bu heqte toxtalghanda, osloda bu qétim ötküzülidighan yashlarni terbiyilesh kursining teyyarliq xizmetliri ongushluq tamamlinish bilen, 18-mart kech ötküzülidighan noruz pa'aliyitining hazirliqlirining dawam qiliwatqanliqini eskertti. 

D u q ning tor sehipiside bu xususta 9-féwral élan qilin'ghan uqturushida bayan qilinishiche, bu qétimqi Uyghur yashlirini terbiyilesh kursi ikki basquchqa bölün'gen halda élip bérilidiken. Birinchi küni, yeni 16-mart küni nobél erkinlik sariyida Uyghur élining künséri yamanlishiwatqan weziyitidin melumat bérish üchün ilmiy muhakime yighini ötküzülidiken. Yumilaq üstel söhbiti sheklidiki bu yighin'gha amérika, kanada, gérmaniye qatarliq ellerdin kelgen d u q rehberliri, norwégiyediki kursqa ishtirak qilidighan Uyghur yashliri, norwégiye we yawropaning birqisim elliridin kelgen kishilik hoquq pa'aliyetchiliri, yawropadiki Uyghur mesilisi mutexessisliri, rafto fondi jem'iyiti wekilliri hemde norwégiye parlaméntining bir qisim ezaliri qatnishidiken. Ikkinchi künidin bashlap yashlarni terbiyilesh kursi dawam qilidiken. Kurs axirlashqan 18-mart küni kechte noruz pa'aliyiti bolidiken.

Norwégiye Uyghur komitéti rehberliridin xelchem xanimmu bu toghriliq ziyaritimizni qobul qilghanda, norwégiyediki Uyghurlarning bu ikki pa'aliyetke estayidil mu'amile bilen teyyarliq qilghanliqini tekitlidi.

D u q ijra'iye komitéti mu'awin re'isi semet abla ependining bildürüshiche, Uyghur yashlirini kishilik hoquq, démokratiye, qanuniy bilimler bilen terbiyilesh kursi norwégiyediki Uyghur yashlirining milliy rohini urghutushqa, xelq'araliq sewiyide pa'aliyet élip bérishigha türtke bolidiken. 

D u q ning bu kurs heqqidiki uqturushida “Bolupmu, bu yighinning xitay da'irilirining sherqiy türkistanda Uyghurlargha yürgüzüwatqan zulumi tarixta misli körülmigen derijide kücheygen mushundaq bir weziyette ötküzülüshi, norwégiyede yashawatqan Uyghur teshkilati we milletning teqdirige köngül bölidighan barche wetendashlirimizning boluwatqan zulumni norwégiye xelqige, munasiwetlik kishilik hoquq teshkilatlirigha, norwégiye hökümitige anglitish xizmetlirining téximu ünümlük élip bérilishini ilgiri sürüshte zor ehmiyetke ige” déyilgen. 

Norwégiye Uyghur komitétining re'isi bextiyar ömer ependi ziyaritimiz esnasida, Uyghur yashlirini terbiyilesh kursining norwégiyede ötküzülüshining ehmiyiti heqqide toxtaldi. D u q ijra'iye komitéti mu'awin re'isi semet abla ependimu bu heqte öz qarashlirini bayan qilip ötti. 

Igilishimizche, norwégiye Uyghur komitétining teshkillishi bilen 15-mart küni osloda ayallar namayishi ötküzülidighan bolup, Uyghur yashlarni terbiyilesh kursidin bir kün burun bolidighan “Bir awaz, bir qedem” sho'ari astidiki bu namayishqa oslodiki ayallardin bashqa, herqaysi ellerdin kelgen d u q rehberliri we norwégiyediki bashqa Uyghur jama'itimu qatnishidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.