Kériyediki hamile qetli'am qilish weqeside yétekchi rol oynighan yéza bashliqi eniwer ismayil xizmitidin toxtitildi

Ötken yilning axiriqi künliri kériyening arish yézisida hamile qetli'am qilish weqesi yüz bérip ana qarnidiki 6 ayliqtin 9 ayliqqa qeder bolghan 4 hamile mejburiy chüshüriwétilgen idi. Weqe ündidar we xelq'ara axbarat wastiliri arqiliq dunyagha ashkarilan'ghandin kéyin xoten wilayetlik we kériye nahiyelik alaqidar organlar weqe üstide tekshürüsh élip barghan. Tekshürüshtin kéyin ötken ayda ziyankeshlikke uchrighan a'ililerge bérip epu sorighan xitay da'iriliri, mushu ayning béshida mezkur weqede yétekchi rol oynighan mu'awin yéza bashliqi eniwer ismayilni xizmitidin toxtatqan. Emma weqening bash rolchisi xitay sékritar sün jibinggha héchqandaq jaza kelmigen.

Töwende muxbirimiz shöhret hoshurning bu heqte teyyarlighan programmisini anglaysiler:

Hörmetlik radi'o anglighuchilar, xoten wilayetlik alaqidar organlar kériyede yüz bergen hamile qetli'am qilish weqesi üstidin tekshürüsh élip barghandin kéyin, weqe yüz bergen nurluq doxturxanisigha 400 ming som jerimane qoyghan. Melum bolushiche, wilayet yene arish yéziliq hökümetkimu 1 milyon 200 ming som jerimane qoyghan؛ bu jerimane pulni yéza tewesidiki barliq ishchi - xizmetchilerdin tutuwalghan. Emma, bu pul ziyankeshlikke uchrighan a'ililerge bérilmigen, pul wilayet maliyesige aghdurulghan.

Yene melum bolushiche, wilayet weqening sadir bolushida yétekchi rol oynidi dep qarighan yéza bashliqi awatxan bilen mu'awin yéza bashliqi eniwer ismayilni xizmitidin toxtitish heqqide buyruq chüshürgen. Emma nahiyediki da'iriler yéza bashliqi awatxanni xizmettiki bashqa netijilirini közde tutup, jazadin qoghdap qalghan. Da'iriler pilanliq tughutqa mes'ul yéza bashliqi eniwer isma'ilni, weqeni wilayetke aldin melum qilmighan yeni hamile chürüshning aldida ehwalni yuqirigha doklat qilmighan dégen eyiblime bilen xizmettin toxtatqan.

Weqe yüz bergen mezgildiki téléfon ziyaretlirimiz dawamida yéza bashliqi awatxan özining xata qilghanliqini üstige élip hamile qetli'amini emdi toxtidighanliqini éytqan we doxturxanida nöwet kütüp turuwatqan hamildar ayalni doxturxanidin qoyup béridighanliqini éytqan. Awatxan yene yéziliq partkom sékritari sün jibingningmu bu ishtin xewiri barliqini ashkarilash arqiliq, weqediki jawabkarning yalghuz özi emeslikini éytqan.

Shu chaghda yene mu'awin yéza bashliqi eniwer isma'ilmu, weqedin sékritar sün jibingning xewiri barliqini, hetta qattiq süylesh arqiliq özige bésim ishletkenlikini ashkarilighan idi.

Hörmetlik radi'o anglighuchilar, yuqiriqi melumatlardin qarighanda, kériyede yüz bergen hamile qetli'am qilish weqeside yétekchilik jehettin 3 - orunda rol oynighan eniwer ismayil xizmitidin toxtitilghan, ikkinchi derijilik rol oynighan yéza bashliqi awatxan peqet tenqidlen'gen we qoghdap qélin'ghan؛ emma bash rol oynighan sékritar sün jibinggha héchqandaq jaza kelmigen. U nöwette ziyankeshlikke uchrighan a'ililer bilen ziyankeshlik qilghuchi organlar otturisida muressechilik rol oynimaqta.