Қарақаш наһийәлик даириләр қассапларниң пичақлириға 15 сантиметирлиқ өлчәм бекиткән

Мухбиримиз қутлан
2015.06.17
yengisar-pichaq.jpg Йеңисардики мәлум бир пичақ дукинидики уйғур һүнәрвән устилар.
wetenmenziriliri.blogspot.com


Нөвәттә уйғур елиниң җәнуб вә шималида даириләрниң пичақ, қиңрақ, палта қатарлиқ тиғлиқ сайманларға болған сәзгүрлүкиниң һәссиләп ешип кәткәнлики мәлум болмақта.

Пичақ түридики тиғлиқ әсвапларниң йеқинқи бирқанчә йиллардин буян хитай һөкүмәт мәмурлири билән аманлиқ хадимлирини қаттиқ тәшвишкә селипла қалмастин, бәлки йәнә райондики көчмән хитай пуқралириниму еғир дәриҗидә  хатирҗәмсизләндүриватқанлиқи билинмәктә.

Нәқ мәйдандин игилигән учурлардин қариғанда, уйғур елиниң җәнубидики қәшқәр, йәкән, хотән қатарлиқ җайларда йәрлик һөкүмәт органлири тиғлиқ әсвапларни чәкләш вә контрол қилиш үчүн кишини һәйран қалдуридиған бимәнә тәдбирләрни йолға қоймақтикән.

Бу йил 5-айниң ахири қарақаш наһийәсиниң зава йезисида 6 нәпәр пидаийниң хитай чарлиғучи сақчи әтритигә өзлири ясивалған бомба билән һуҗум қилиши шундақла хотән наһийәсиниң лайқа йезисида ваң фамилилик муавин йеза башлиқиниң пичақлап өлтүрүлүши даириләрниң тиғлиқ сайманларға болған сәзгүрлүк кесилини техиму улғайтивәткән.

Йеқинда қарақаш наһийәсиниң зава йеза базирида қассапчилиқ қилидиған бир кишиниң радийомизға билдүрүшичә, наһийәлик партком буйруқ чиқирип уйғур қассапларниң бирдәк 15 сантиметирдин қисқа пичақ ишлитишини бекиткән. Бу бәлгилимә һазир қарақаш наһийә базирида қаттиқ иҗра қилинмақтикән.

Пичақ - уйғурлар һаятида кәм болса болмайдиған тиғлиқ сайман. Тарихтин буян уйғур әрлири йениға пичақ асидиған адәтни шәкилләндүргән. Бу бир тәрәптин пичақниң күндилик турмуштики ишлитилиш қиммитиниң йоқирилиқидин болса, йәнә бир тәрәптин әрләрниң әрлик җасаритини намайән қилидиған бир безәк буюми сүпитидә ишлитилгәнликидин болған.

Һалбуки, 90-йиллардин башлап хитай даирилириниң уйғур пичақлириға болған контроллуқи һәссиләп күчийишкә башлиған. Буниң нәтиҗисидә уйғурларниң әң нәпис вә әң даңлиқ қол һүнәр сәнитиниң бири һесабланған пичақчилиқ кәспи чәклимигә учриған. Һәтта хитай таратқулириму өткән йилидин буян дуняға даңлиқ йеңисар пичақлиқи вә униң содисиниң заваллиққа йүзләнгәнликини хәвәр қилған.

Йеқинда түркийәгә келип йәрләшкән бир уйғурниң өткән йили йәкән базирида көргән бир ечинишлиқ һекайиси бу нуқтини йәниму дәлилләйду. Униң билдүрүшичә, 2014-йили 10-айниң ахири йәкән базиридики бир уйғур самсипәз пияз тоғраватқан қиңриқи билән самсиханидин икки қәдәм сиртқа чиқишиға етип ташланған. Бу әһвал хитай қораллиқ күчлириниң уйғурларниң қолидики тиғлиқ сайманларға болған сәзгүрлүкиниң қайси дәриҗигә барғанлиқини көрситип бәрмәктә.

Тәпсилатини аваз улиништин аңлиғайсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.