Qaraqashtiki sékritarning tarawa'ihda adem tutush we gumandarlarning sékritar a'ilisige hujum qilish jeryani

Qariqash nahiyisining purchaqchi yézisida 19 - iyul küni yüz bergen tarawihda adem tutush weqesi we buning aqiwitide kélip chiqqan kent sékritari a'ilisining tang'atardin awwal hujumgha uchrash weqesi inchike tepsilatliri bilen ashkarilandi.

Melum bolushiche, sékritar rejep islam, meschitke üsüp kirip, oquluwatqan tarawiy namizini bölüp jama'etke buyruq soqqan we 6 neper gumandarning ismini chaqirip meschittin élip chiqip ketken, u yene meschittin chiqishning aldida, imamni du'ani uzunraq oqup, jama'etni meschitning ichide tutup turushqa buyrighan. Meschitni qorshap turghan xitay qoralliq qisimliri sékritargha bu derijide jasaret ata qilalighan bolsimu, emma uning qoligha tutquzulghan we kéchiche béshigha qoyup yatqan térrorchilardin qoghdinish kaltiki uni we uning ayalini 5 neper pida'iyning qaxshatquch zerbisidin qoghdap qalalmighan.

Tarawida adem tutush weqesi, belgilik derijide din we medeniyet chüshenchisige ige kishilerni oylandurmay we heyran qaldurmay qalmaydu. Sékritargha bunchiwala chong jasaretni bergen küch néme? sékritar 6 neper namazxanni jaynamazning üstidin tutup achiqip ketkende, imamning we jama'etning inkasi néme boldi? biz bu so'allarning türtkisi bilen shu küni sékritar bilen birlikte wezipe ötigen kent amanliq kadiridin neq meydandiki tepsiliy ehwallarni soriduq. Uning bayan qilishiche, shu küni kent kadirliri, yéza organ kadirliri, saqchilar we alahide saqchilar bolup 200 ge yéqin kishi, meschitte tarawih namizi oquwatqan 150ke yéqin kishini qorshawgha alghan. Tarawih mezgilide awwal meschitning arqa ishikige qulup sélin'ghan, arqidin meschitning dérizisidin ichige qol chiraqlar yéqilip namazxanlar arisidiki gumandarlar izdelgen. Meschitning ichige üsüp kirgen, ikki kent kadiri qollirigha tutquzulghan qara tizimlikni oqup, 6 neper gumandarni meschittin élip chiqip ketken. Sékritar chiqip kétish chéghida yene, imamgha du'ani uzunraq oqup jama'etni meschitning ichide tutup turushqa buyrighan.

Hörmetlik radi'o anglighuchilar, yuqirida anglighininglardek, xitay saqchilirining peylidiki wehshilikni yaxshi bilgen imam we jama'et bu yolsizluqqa we zorawanliqqa süküt qilghan. Emma közetküchilerning déginidek süküt héchqachan teslim bolghanliq emes, razi bolghanliq esla emes. Shunga bu zorawanliqning jawabi kéchikmigen. Shu kuni neq meydanda aktip rol alghan sékritar rejep islamning a'ilisi aridin 4 sa'et ötkende ejellik hujumgha uchrighan.

Kent amanliq mudirining bayan qilishiche, sékritar rejep islam shu kuni tarawihdiki wezipisini toluq we aktip orundighandin kéyin öyige kélip endishe ichide yatqan we we hökümet terep tarqatqan térrorluqqa qarshi turush kaltikini béshigha qoyup yatqan. Bir meheldin kéyin ashxana öyidiki ayalining chiqirighan awazi bilen oyghan'ghan؛ u yastuqining tégidiki kaltikini élip hoyligha chiqqinida ayalini chanap öltürüp bolghan hujumchilar sékritarning özige étilip kelgen. Sékritar taqabil turup baqqan bolsimu, emma qoligha tutquzulghan 50 santimitir uzunluqtiki rézinka kaltek ishqa yarimighan. U öyining karidorigha qéchip kirgen we karidorning ishikini ichidin taqiwélishqa urun'ghan, lékin ishik qoshqanatliq bolghachqa, her ikki qanatni teng yépishqa qadir bolalmighan؛ u karidor ishikdin chikinip ashxana öyining ishikini ichidin dumbisi bilen taqiwalghan, hujumchilar ishikning üstidiki dérizini chéqip, dérizidin qol tiqip turup sékritarning bash qisimini chanighan, axiri halsizlan'ghan sékritar ishikni tosup qalalmighan. Bösüp kirgen hujumchilar sékritarning udul kelgen yérini chanap öldi dep qarighandin kéyin meydandin uzaqlashqan. Bir meheldin kéyin hushigha kelgen sékritar qan ichidin ömilep qopup, yataq öyidin qol téléfonini alghan we ehwalni saqchixana bashliqi we yéza bashliqigha melum qilghan.

Hörmetlik radi'o anglighuchilar, Uyghur siyasiy mulahizichiliri we közetküchiler, hujumchilar tarawi namizini buzush we jaynamaz üstidiki namazxanni tutqun qilishtin ibaret bu zorawanliq weqesining gerche bash orunlashturghuchisi, buyruqchisi we heqiqiy ijrachilirigha zerbe bérelmigen bolsimu, uning bir shérikige, chaparminige qaxshatquch zerbe bergenlikini, zulum we zorawanliq dawam qilghanséri, hujumchilarning téxnikiliq küchi we maharitiningmu barghanséri ashidighanliqini, zulum salghuchi we zulumgha yantayaq bolghuchilarning haman bir küni jazasini tartidighanliqini ilgiri sürüshmekte we xitayni basturush siyasetliridin waz kéchishke dewet qilmaqta.