Qeshqer uniwérsitétining 4 mudir we mu'awin mudiri tutqun qilin'ghan

Muxbirimiz shöhret hoshur
2018-09-07
Élxet
Pikir
Share
Print
Qeshqer uniwérsitétining mektep partkom da'imiy hey'iti proféssor gülnar obul.
Qeshqer uniwérsitétining mektep partkom da'imiy hey'iti proféssor gülnar obul.
Social Media

Ashkarilinishiche qeshqer uniwérsitétning mudiri ekber ömer, mu'awin mudirliridin muxter abdughopur, qurban osman we gülnar obullar, mushu heptining béshida "Ikki yüzlimichilik" bilen eyiplinip tutqun qilin'ghan. Muxbirimizning téléfonini qobul qilghan qeshqer uniwérsitétining ishxana xadimi 4 proféssorning nöwette wezipisidin qaldurulghan we qamaqqa élin'ghanliqidin xewiri barliqini, emma qaysi qamaqxanida ikenlikini dep bérelmeydighanliqini bayan qildi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Muhajirette yashawatqan, qeshqer uniwérsitétning weziyitini mektep tor béti arqiliq közitip kéliwatqan bir anglighuchimiz 6-séntebir küni radiyomizgha mektup yollap, mushu ayning 2 ‏-künidin bashlap, qeshqer uniwérsitéti tor bétidiki mektep rehberlikining tizimlikide ushtumtut özgirish bolghanliqini, tizimlikte eslide bar bolghan uniwérsitét mudiri erkin ömer, mu'awin mudir muxter abdughopur, qurban osman we gülnar obullarning rehberlik tizimlikidin öchürülgenlikini melum qildi. Anglighuchimizning bu mektubida, 2 ‏-séntebirdin étibaren mezkur 4 proféssorning ish-izliri heqqidiki xewer we resimlerning mektep tor bétidin chiqiriwétilgenliki bayan qilin'ghan we ularning jazalan'ghanliq éhtimalliqi inkas qilin'ghan. Biz bu yip uchigha asasen qeshqer uniwérsitétining alaqidar ishxanisigha téléfon qilduq. Biz alaqidar xadimdin eng awwal tutqun qilin'ghan mudirlar ichide mu'awin mudir muxter abdughopurning bar yoqluqini soriduq. U bu ishlarning mexpiy élip bériliwatqanliqini, shunga özining muxter abdughopurning ehwalidin xewersizlikini éytti. Biz andin mudir ekberning qachan mekteptin heydelgenlikini soriduq. U bu heqte nöwetchi xadimlardin melumat élishimizni tewsiye qildi. Biz uningdin qeshqer uniwérsitétining mudiri kim ikenlikini sorighinimizda, nöwette mudirning ornining bosh ikenlikini, yéngi mudirning téxi teyinlenmigenliki we bir mu'awin mudirning mektepni bashquruwatqanliqini ashkarilidi. Biz arqidin mektepning eslidiki mudirining kim ikenlikini soriduq. U esli mudirning erkin ömer ikenliki we uning yéqinda wezipisidin qaldurulghanliqini éytti. Biz uningdin mektep partkom da'imiy hey'iti, proféssor gülnar obulni soriduq. U gülnar obulningmu wezipisidin élip tashlan'ghanliqini éytti. Biz uningdin ularning néme sewebtin wezipisidin élip tashlan'ghanliqini sorighinimizda, u, özining bu heqte tepsiliy melumat bérishke hoquqi yetmeydighanliqini éytti. Biz uningdin yéqinda mektepte wezipisidin qaldurulghan 4 rehberning isimlirini dep bérishni soriduq. U bu töt kishining "Erkin ömer, muxter, qurban osman we gülnar obul" ikenlikini delillidi. Biz uningdin ularning néme üchün wezipisidin qaldurulghanliqini tekrar sorighinimizda, ularning hemmisiningla "Ikki yüzlimichiler" ikenlikini we shuning üchün jazalan'ghanliqini éytti. Biz uningdin nöwette bu délogha qaysi j x tarmiqining qol tiqqanliqini we ularning nede tutup turuluwatqanliqini soriduq. U özining bu so'algha jawab béreligüdek melumatqa ige ikenlikini, emma yuqiridin ruxset almay turup, bu heqte éghiz achalmaydighanliqini éytti. 

Biz qeshqer uniwérsitéti mudirlirining ish-izliri heqqide xitayning beydu uchur ambirinimu tekshürüp körduq. Ularning ish-izliri heqqidiki xewerler gerche qeshqer uniwérsitétining tor bétidin öchürüwétilgen bolsimu, emma bezi uchurlar xitay ölkiliridiki mekteplerning torbetliride saqlinip qalghan. Melum bolushiche mudir we proféssor erkin ömer téxi ikki ayning aldida shénjéndiki bir uniwérsitétni ziyaret qilghan؛ gülnar obul bu yil 4 ‏-ayda gu'angdungdiki bir uniwérsitétta léksiye sözligen. 
Bu uchurlar, qeshqer uniwérsitétning bu 4 neper mudir we proféssorigha bérilgen bu jazaning ushtumtut bolghanliqini, yeni nöwette Uyghur rayonida Uyghur emeldarlargha qarita dawam qiliwatqan "Ikki yüzlimichilikke qarshi turush" namidiki siyasiy boranning zerbisige uchrighanliqini ashkarilimaqta.

Toluq bet