Rabiye qadir xanim xelq'ara kechürüm teshkilatining bashliqliri we qollighuchi kapitalistlar bilen atlantada uchrashti

D u q re'isi rabiye qadir xanim we mu'awini ömer qanat ependi xelq'ara kechürüm teshkilatining bashliqliri we qollighuchi kapitalistlar bilen xatire sürette. 2016-Yili 27-öktebir.

Uyghur milliy herikiti rehbiri rabiye qadir xanim ötken peyshenbe küni xelq'ara kechürüm teshkilatining shöbe bashliqliri yighinigha sherep méhmini süpitide qatniship, yighindiki kechürüm teshkilatining amérikidiki 8 shöbe bashliqi we mezkur teshkilatni qollighuchi bir qisim kapitalistlar bilen uchrashti. Yighinda asasliq söz qilghuchi rabiye xanim nöwettiki Uyghur weziyiti heqqide doklat bergendin kéyin, yighin qatanshquchilirining so'allirigha jawab bergen. Yighinning bir sa'etche dawam qilghan so'al-jawab qismida, rabiye xanim Uyghurlarning pasport mesilisi we yéngi diniy cheklimiler heqqide nuqtiliq toxtalghan.

Xelq'ara kechürüm teshkilati rabiye qadir xanimni türmidin qutuldurushta aktip rol oynighan orunlardin biri. Mezkur teshkilat rabiye xanimning perzentliri türmige tashlan'ghandimu weqege jiddiy inkas qayturghan we weqeni izchil halda küntertipte tutup, weqege qarita xelq'ara jama'et pikrining shekillinishide yétekchi rol oynighan. Kechürüm teshkilati bu qétimliq yighinigha rabiye xanimni sherep méhmini süpitide teklip qilip, uninggha mezkur teshkilatning herqaysi shöbe bashliqliri we qollighuchiliri bilen uchrishish we tonushush pursiti yaritip bergen. Yighin dawamida rabiye xanimgha hemrah bolghan we terjimanliq qilghan dunya Uyghur qurultiyi mu'awin re'isi ömer qanat ependi bu qétimqi bu uchrishish heqqide melumat berdi.

Ömer qanat ependining bildürüshiche, rabiye xanim bu qétimqi yighinda yighinning sherep méhmini, shundaqla asasliq söz qilghuchisi bolghan. Yighinda hörmet we éhtiram bilen tonushturulghan rabiye xanim nöwettiki Uyghur weziyiti heqqide melumat bergendin kéyin, Uyghur weziyiti bilen yéngidin tonushuwatqan yighindiki kapitalitslarning so'allirigha jawab bergen. Yighinda rabiye xanim süriyede ashkara jeng dawam qiliwatqan we qan tökülüwatqan bolsa, Uyghur rayonida bundaq bir jengning uzundin béri, yoshurun halda dawam qilip kéliwatqanliqini we xitayning bu yerde tökülüwatqan qanlarni axbarattin yoshurup kéliwatqanliqini ilgiri sürgen. Xanim sözide, süriyede anilar urushta ölgen perzentlirini baghrigha bésip yighlawatqan bolsa, Uyghur anilirining 5 ‏-iyulda ghayib bolup ketken perzentlirining téxiche uchurinimu alalmighanliqini, ghayib baliliri üchün yighlash we iz-dérikini élishningmu jinayet saniliwatqanliqini pakitliri bilen otturigha qoyghan. Rabiye xanim siyasiy mehbuslargha ölüm jazasi bérish, zulumgha isyan kötürgenlerni neq meydanda étiwétish qatarliq dölet zorawanliqining xitayda, belkim dunyada peqet Uyghurlarningla béshigha kéliwatqanliqini ilgiri sürgen.

Rabiye xanimning shexsiy we a'ile kechmishi, shundaqla nutqidin tesirlen'gen, Uyghurlarning nöwettiki jiddiy weziyitidin endishilen'gen teshkilatning herqaysi shöbe bashliqliri rabiye xanimni öz tewelikliride doklat bérishke dewet qilghan.

Ömer qanat ependining déyishiche, rabiye xanimning atlantidiki uchrishishi, uning ötken bir hepte ichide élip barghan ikkinchi chong pa'aliyitidur؛ u aldinqi qétimliqida amérika diniy ishlar komitétidiki muhim shexsler bilen körüshken.

Yuqiridiki ulinishtin rabiye qadir xanimning kechürüm teshkilatining birqisim bashliqliri we qollighuchi kapitalistlar bilen atlantada uchrashqanliqi heqqidiki melumatning tepsilatini anglaysiler.