D u q re'isi rabiye qadir xanim norwégiyede ikki chong murasimgha qatnashti

D u q re'isi rabiye qadir xanim ilgiri rafto mukapatigha érishkenler bilen xatire sürette. 2016-Yili 20-noyabir, norwégiye.

Dunya Uyghur qurultiyi re'isi rabiye qadir xanim bilen mu'awin re'isi ömer qanat ependi 11-ayning 20-küni rafto fondi qurulghanliqining 30 yilliqi munasiwiti bilen norwégiyening bérgin shehiride ötküzülgen 2016-yilliq rafto kishilik hoquq mukapatini tarqitish murasimigha qatnashti. Murasimgha 30 yildin béri yawropadiki insan heqliri mukapatigha érishken kishiler teklip qilin'ghan bolup, bularning ichide rafto mukapatigha érishkendin kéyin nobél mukapatigha sazawer bolghan bir qisim kishilermu bar iken. Murasimgha norwégiyening aliy rehberlirimu ishtirak qilghan.

Bu murasimda 2016-yilliq rafto insan heqliri mukapati iraqliq türkmen pa'aliyetchi yanar muhemmet xanimgha bérilgen. Murasim axirida yanar muhemmet xanim ijtima'iy taratqular arqiliq pütün Uyghur xelqige salam yollighan.

Biz bu heqte tepsiliy melumat igilesh üchün norwégiyening bérgin shehiridiki pa'aliyetlerge qatnishiwatqan ömer qanat ependi bilen téléfon söhbiti élip barduq.

Ömer qanat ependi rabiye xanimning norwégiyening bergin shehiride ötküzülgen ikki muhim pa'aliyetke qatnishish üchün alahide teklip boyiche 17-noyabir küni kelgenlikini bayan qildi.

Ömer qanat ependi 2016-yilliq rafto insan heqliri mukapatigha érishken yanar muhemmet xanimning iraqtiki ayallarning hoquqlirini qoghdaydighan muhim bir pa'aliyetchi ikenlikini tekitlidi.

Dunya Uyghur qurultiyi mu'awin re'isi ömer qanat ependi 20-noyabir küni ötküzülgen 2016-yilliq rafto mukapatini tarqitish shundaqla rafto wexpining qurulghanliqining 30 yilliqini xatirilesh murasimigha norwégiyening yuqiri qatlam rehberliriningmu ishtirak qilghanliqini, murasim jeryanida rabiye qadir xanimning ular bilen uchrashqanliqini bayan qildi.

Ömer qanat ependi murasim jeryanida rabiye qadir xanimning zhurnalistlar bilenmu uchrashqanliqini bayan qildi.

Rafto fondi 1986-yili qurulghan yawropadiki abruyluq insan heqliri teshkilati bolup, 2004-yili rabiye qadir xanim türmidiki chaghda uninggha rafto insan heqliri mukapati bérilgen idi. Mezkur mukapat rabiye qadir xanimning türmidin qoyup bérilishidimu muhim rol oynighan iken.