Rabiye qadir xanim yaponiye parlaméntida Uyghur kishilik hoquq mesililiri boyiche doklat berdi

Rabiye qadir xanim bashchiliqidiki d u q rehberliri yaponiye parlaméntida yighinda. 2017-Yili 15-féwral, tokyo.

Rabiye qadir xanim bashchiliqidiki d u q rehberliri yaponiye bash weziri shinzo abéning yardemchi éto séiji(soldin ikkinchi) we yaponiye dölet bixeterlik komitétining sabiq re'isi, yaponiye parlaménti Uyghur dostluq guruppisining mes'uli furiya kéyji(soldin üchinchi) qatarliq erbablar bilen. 2017-Yili 15-féwral, tokyo.

11-Féwraldin bashlap yaponiyede ziyarette boluwatqan Uyghur milliy herikitining rehbiri rabiye qadir xanim bügün yaponiye parlaméntida Uyghur mesililiri boyiche doklat berdi.

Yaponiye parlaméntida ötküzülgen Uyghur mesililiri boyiche doklat bérish yighini parlamént aliy kéngesh yighin zalida élip bérilghan bolup, yighin'gha yaponiye bash weziri shinzo abéning yardemchisi éto sé'iji riyasetchilik qilghan.

Yighinda aldi bilen, sabiq yaponiye dölet bixeterliki komitétining re'isi, yaponiye parlaménti Uyghur dostluq guruppisining mes'uli furiya kéyji söz qilip 2009-yilidiki 5-iyul ürümchi weqesidin kéyin Uyghur élida xitay kompartiyesining Uyghurlarni basturush siyasitining kündin-kün'ge kücheygenlikini, Uyghur élining künsayin nacharlishiwatqan siyasiy weziyitige yaponiye parlaménti Uyghur dostluq guruppisining yéqindin diqqet qilip kéliwatqanliqini ilgiri sürgen.

Rabiye qadir xanimning yaponiye parlaméntida Uyghur kishilik hoquq mesililiri boyiche doklat bérish yighini chüshtin kéyin sa'et biridin ikki yérimgha qeder dawam qilghan bolup, yighin'gha yaponiye parlaméntidiki Uyghur mesilisige köngül bölüwatqan bir qisim ezalar qatnashqan we Uyghur kishilik hoquq mesilisige yardem qilish toghrisida kéngeshken.

Doklattin kéyin rabiye qadir xanim yaponiye parlaméntidiki bir qisim yuqiri derijilik erbablar bilen ayrim söhbette bolghan.

Yuqiridiki awaz ulinishidin, yaponiyediki ixtiyariy muxbirimiz haji qutluq qadirining bu heqtiki tepsiliy melumatlirini anglaysiler.