Гөрүдики мәһбус ришат һаҗиниң сотиниң кечиктүрүлгәнлики илгири сүрүлмәктә

Хитай издәватқан абдувәли һаҗи

Биз өткән айниң ахири атуштики ришат һаҗи исимлик бир дукандарниң түркийәгә чиқип кәткән акисиниң аталмиш җинайити үчүн дәсләптә гөрүгә елинғанлиқи вә арқидин қолға елинғанлиқи һәққидә бир йүрүш хәвәр елан қилған идуқ. Өткән айдики ениқлашлиримиз давамида, ришат һаҗиниң мушу айниң бешида соти ечилидиғанлиқи мәлум болған иди. Вәқәдин хәвәрдар киши бүгүн радийомизға әлхәт арқилиқ учур йоллап, ришат һаҗиниң сотиниң кечиктүрүлгәнликини баян қилди. Мухбиримизниң ениқлиши давамидиму ришат һаҗиниң сотиниң техи ечилмиғанлиқи дәлилләнди.

Һөрмәтлик радийо аңлиғучилар, мәһбус ришат һаҗи һәққидә әң дәсләп йип учи билән тәминлигән бир аңлиғучимиз, бүгүн радийомизға йәнә бир парчә әлхәт йоллап, әслидә дикабирниң бешида ечилмақчи болған сотниң намәлум сәвәбтин кечиктүрүлгәнликини мәлум қилди. Биз әһвалниң растлиқини ениқлаш үчүн атуш шәһәрлик сот мәһкимисигә телефон қилдуқ. Телефонимизни алған сот хадими, бундақ бир сотниң ечилған вә ечилидиған сот җәдвилидә йоқлуқини баян қилиш билән бирликтә, әһвални ришат һаҗиниң делосини тутқан сақчи хадимидин ениқлап беқишимизни ейтти. Биз ришат һаҗини тутқун қилған сақчи хадимиға телефон қилғинимизда, у әһвални дөләт аманлиқ сақчилиридин ениқлап беқишимизни ейтти. Әмма, делоға мәсул сақчилар, бу һәқтә гәп қилиштин өзини қачурди.

Өткән айдики ениқлишимиз давамида, ришат һаҗиниң момиси рәйһанниса ханим, қолға елиш уқтурушидин кейин сот һәққидиму уқтуруш тапшурувалғанлиқи, һәтта адвокатму тутқанлиқини баян қилған иди.

Биз сақчи вә сот хадимлириниң тәвисийәси бойичә, ришат һаҗиниң соти һәққидә униң аилә тавабиатлиридин мәлумат соридуқ. Мәзкур аилә ришат һаҗиниң сотиниң техичә ечилмиғанлиқини баян қилди.

Һөрмәтлик радийо аңлиғучилар, юқириқи учурлардин, ришат һаҗиниң сотиниң ечилмиғанлиқи мәлум, әмма униң кечиктүрүлгән яки бикар қилинғанлиқи, кечиктүрүлгән болса немә үчүн кечиктүрүлгәнлики вә қачанға кечиктүрүлгәнлики һазирчә мәлум әмәс.