Görüdiki mehbus rishat hajining sotining kéchiktürülgenliki ilgiri sürülmekte

Muxbirimiz shöhret hoshur
2016-12-23
Élxet
Pikir
Share
Print
Xitay izdewatqan abduweli haji
Xitay izdewatqan abduweli haji
Photo: RFA


Biz ötken ayning axiri atushtiki rishat haji isimlik bir dukandarning türkiyege chiqip ketken akisining atalmish jinayiti üchün deslepte görüge élin'ghanliqi we arqidin qolgha élin'ghanliqi heqqide bir yürüsh xewer élan qilghan iduq. Ötken aydiki éniqlashlirimiz dawamida, rishat hajining mushu ayning béshida soti échilidighanliqi melum bolghan idi. Weqedin xewerdar kishi bügün radiyomizgha elxet arqiliq uchur yollap, rishat hajining sotining kéchiktürülgenlikini bayan qildi. Muxbirimizning éniqlishi dawamidimu rishat hajining sotining téxi échilmighanliqi delillendi.

Hörmetlik radiyo anglighuchilar, mehbus rishat haji heqqide eng deslep yip uchi bilen teminligen bir anglighuchimiz, bügün radiyomizgha yene bir parche elxet yollap, eslide dikabirning béshida échilmaqchi bolghan sotning namelum sewebtin kéchiktürülgenlikini melum qildi. Biz ehwalning rastliqini éniqlash üchün atush sheherlik sot mehkimisige téléfon qilduq. Téléfonimizni alghan sot xadimi, bundaq bir sotning échilghan we échilidighan sot jedwilide yoqluqini bayan qilish bilen birlikte, ehwalni rishat hajining délosini tutqan saqchi xadimidin éniqlap béqishimizni éytti. Biz rishat hajini tutqun qilghan saqchi xadimigha téléfon qilghinimizda, u ehwalni dölet amanliq saqchiliridin éniqlap béqishimizni éytti. Emma, délogha mes'ul saqchilar, bu heqte gep qilishtin özini qachurdi.

79 Yashliq reyhannisa anining qamaqqa élin'ghan kichik newrisi rishat haji
79 Yashliq reyhannisa anining qamaqqa élin'ghan kichik newrisi rishat haji Photo: RFA

Ötken aydiki éniqlishimiz dawamida, rishat hajining momisi reyhannisa xanim, qolgha élish uqturushidin kéyin sot heqqidimu uqturush tapshuruwalghanliqi, hetta adwokatmu tutqanliqini bayan qilghan idi.

Biz saqchi we sot xadimlirining tewisiyesi boyiche, rishat hajining soti heqqide uning a'ile tawabi'atliridin melumat soriduq. Mezkur a'ile rishat hajining sotining téxiche échilmighanliqini bayan qildi.

Hörmetlik radiyo anglighuchilar, yuqiriqi uchurlardin, rishat hajining sotining échilmighanliqi melum, emma uning kéchiktürülgen yaki bikar qilin'ghanliqi, kéchiktürülgen bolsa néme üchün kéchiktürülgenliki we qachan'gha kéchiktürülgenliki hazirche melum emes.

Toluq bet