Xoten nahiyesidiki bir kentte 70 a'ilidiki er - ayalning saqal - buruti chüshürülup, ropashliri éliwétilgen

Igilishimizche, bu yil 9 - aydin buyan xoten nahiyesidiki yéza - kentlerde da'irilerning diniy we milliy adetlerge qarita mislisiz derijidiki kontrolluq siyasiti yürgüzülgen.

Xoten nahiye langru yézisining melum kent sékritari bu heqte radi'omiz ziyaritini qobul qildi. Uning bildürüshiche bu yil 9 - aydin buyan mezkur kentte olturushluq 70 a'ilidiki 45 yashtin töwen erlerning saqal - buruti chüshürülüp, barliq ayallarning ropashliri mejburiy éliwétilgen.

Melum bolüshiche, xoten wilayitining herqaysi yéza - kentliride buningdin birqanche yillar ilgiri bu türdiki cheklimiler mewjut bolsimu, lékin uni ijra qilishta melum derijide élastikiliq chare - tedbirler qollinilghan. Halbuki, bu yil mayda Uyghur aptonom rayonida bir yil dawamlishidighan “Qattiq zerbe bérish” dolquni bashlan'ghandin kéyin, bolupmu qariqashtiki “Qorshap tutush” herikitidin kéyin yerlik da'irilerning déhqanlargha bolghan kontrolluqi mislisiz derijide kücheygen.

Yoqiri derijilik hökümet orunlirining bésimi we körsetmisi bilen kent kadirliri déhqanlarning eng adettiki a'iliwiy hayati we diniy adetlirige qeder chat kériwalidighan ishlar hessilep köpeygen.

Langru yézisidiki melum kent sékritarining bildürüshiche, bu yil 9 - aydin buyan nahiyelik we yéziliq partkomning bésimi bilen kent kadirliri kéche - kündüz nöwetchilikte turup kentning “Muqimliqi” ni saqlighan. Yoqirining buyruqi boyiche kent teweside téxiche yüzini échiwetmigen eng axiriqi 70 a'ilidiki chong - kichik ayallarning ropashlirini pütünley éliwetken.

U ziyaritimiz jeryanida munularni tekitlidi: “Hökümettin bérilidighan eng töwen turmush kapalet pulini toxtitish, jerimane qoyush yaki qamap qoyush, hetta tutup yoqiri derijilik hökümet orunlirigha ewetip bérishtek türlük chare - tedbirler we tehditler arqiliq, axiri kentimizdiki eng axiriqi 70 a'ilidiki ayallarning yüzini toluq échip bolduq. Erlerning burut - saqal mesiliside 45 yashni ölchem qilduq. Egerde 45 yashtin yoqiri erler muwapiq yosunda burut - saqal qoyghan bolsa, ulargha süküt qilduq. Egerde 45 yashtin töwen erler, bolupmu burut - saqalni ghelite qoyiwalghan yaki yash turup saqal qoyiwalghanlarni tenqid - terbiye élip bérish hetta qorqutush arqiliq burut, saqallirini pütünley chüshürduq. Burut qoyghanlarmu buning sirtida qalmidi. Qarshiliq qilghan erlerning ayalliri yaki anilirini ekilip terbiye ishliduq. Ropashni éliwétishni ret qilghan ayallarning erliri bilen atilirini ekilip xizmet ishliduq. Ulargha hökümetning emir - permanlirigha qarshiliq qilmasliqni, eger qarshiliq körsetse, neq meydanda étip tashlinidighanliqini éytip maqulgha keltürduq. Mushundaq bir qatar japaliq xizmetler netijiside kentimizdiki barliq a'ililerni kélishim we ehdinamilerge qol qoydurup saqal,burut we ropashlardin xaliy qilduq.”

U yene her jüme küni kent saqchiliri bilen bille meschitning aldigha bérip kenttiki déhqanlarning jüme namaz oqushini közitidighanliqini, sirttin kelgen “Gumanliq ademler” yaki “Yash qoramigha toshmighan” mektep balilirining meschitke kirishini tosudighanliqini ilgiri sürdi.

Tepsilatini awaz ulinishtin anglighaysiz.