Qaraqash saqchi xadimi: “Terbiyilesh merkizide 50 ‏-70 kwadrat métirliq yataqta 70 kishi yatidu”

Gérmaniyede yashawatqan muhajir osman tursun xotende lagérdin qoyup bérilgen we dubeyge chiqirilghan oghlidin anglighanlirigha asasen, guma nahiyisidiki oghli yatqan lagérda 60 kishining bir yataqta turidighanliqi, yataqning kichikliki sewebidin tutqunlarning kün boyi öre turushqa mejbur bolidighanliqi, oltursa yaki yatsa, yataqqa sighmaydighanliqi, shunga 60 kishining 15tin nöwet bilen ulaydighanliqini bayan qilghan idi. Muxbirimizning 14-iyun küni qaraqash chinibagh saqchi xadimini ziyaret qilishi dawamida osman tursunning balisining dégenlirining toghra ikenliki delillendi. Mezkur saqchi xadimi, 50-70 kwadrat métirliq bir yataqta az dégende 70 kishining bille yatidighanliqini bayan qildi.

Biz ötken heptilerde, xotendiki xitay saqchilirining gérmaniyede yashawatqan muhajir osman tursunni jasusluqqa köndürüsh üchün gumada yighiwélish lagérida yatqan oghlini qoyup bergenliki we dadisi bilen kélishish üchün dubeyge yolgha salghanliqi heqqide melumat bergen iduq. Ziyaritimizni qobul qilghan osman tursun oghlidin anglighanlirigha asasen, gumadiki bir lagérda 60 kishining bir yataqta turidighanliqi, tengla yétishqa mumkin bolmighanliqi üchün 15 tin nöwet bilen uxlaydighanliqini bayan qilghan idi. 

U yene oghli yatqan kamérda tutqunlarning kün boyi sirtqa chiqirilmaydighanliqi, hem yémek-ichmek, öginish we uxlishiningmu mushu birla orunda - kamérda dawam qilidighanliqini bayan qilghan. Uning déyishiche, kamérdiki qistangchiliq we buningdin kélip chiqqan sésiqchiliq sewebidin, kamérda éghir derijide taziliq mesilisi körülgen, yeni tutqunlarning ich kiyimliride buzulush peyda bolghan. Osman tursun yene oghlidin anglighanlirigha asasen, mezkur kamérda tutqunlarning kamérdiki birdinbir hawadandin 5 minuttin nöwetliship nepes alidighanliqini éytqan idi. 

Qariqashning chinibagh saqchi xadimini téléfon ziyariti qilishimiz dawamida, osman tursunning oghli memet tursunning lagérlar heqqide bergen yuqiriqi melumatlirining toghriliqi delillendi. Chinibagh saqchi xadimi lagérda az dégende 70 kishining bir sinipta oquydighan we bir yataqta yatidighanliqini bayan qildi. U bu yataqlarning 50 kwadrat métir bilen 70 kwadrat métir arisida ikenliki ashkarilidi. 

Kanadadiki Uyghur pa'aliyetchi, bir öy-imaret qurulushi rémont qilish shirkitining sahibi tuyghun abduweli ependi adette qurulush téxnikisi we qa'ide-nizamliri boyiche, kanada qatarliq köpligen döletlerde 70 kwadrat métirliq orunda 4 janliq bir a'ilining turalaydighanliqi, buningdin artuq kishi turushqa ruxset qilinmaydighanliqi, shunga osman tursunning oghli éytqan aqiwetlerning tamamen mumkinlikini ilgiri sürdi. U yene 70 kwadrat métirliq öyge 35 kariwat sighdurghini bolmaydighanliqi, shunga saqchi xadimining lagérdiki yataqlarni kariwatliq dep teriplishining toghra bolmasliqi mumkinlikini tekitlidi.