Tibetni idare qilish siyasitining Uyghur éligha köchürüp kélinishi qandaq aqiwetlerni élip kélidu?

Muxbirimiz qutlan
2016-12-14
Share
xitay-saqchi-herbiy-maniwer-xoten.jpg Xitay qoralliq küchlirining "Térrorluqqa zerbe bérish" manéwiridin körünüsh. 2014-Yili 6-iyun, xoten.
AFP


Chén chüen'go Uyghur aptonom rayonigha partkom sékritari bolup teyinlen'gen 3 aydin buyan, uning tibette qollan'ghan bashqurush usullirini Uyghur diyarigha köchürüp kélip sinaq qiliwatqanliqi melum bolmaqta.

Aldinqi küni xongkongda chiqidighan "Jenubiy junggo etigenlik pochtisi" géziti bu heqte mexsus maqale élan qilip, chén chüen'goning "Tibetni idare qilish siyasitini nöwette Uyghur diyarigha köchürüp ekilip ishlitiwatqanliqi" ni ilgiri sürdi.

Uyghur élidin radiyomiz ziyaritini qobul qilghan saqchixana xadimliri nöwette yézilardiki her töt kentni birleshtürüp bir siyasiy idare qilish bashqarmisi qurulghanliqini bildürdi.

Xoten wilayitining melum nahiyesige qarashliq bir yéziliq saqchixanining bir neper yardemchi saqchisi adette resmiy saqchi bilen yardemchi saqchilardin teshkillen'gen 8-10 neper saqchining 24 sa'et kentte charlash élip baridighanliqini, ahalisi köp bezi chong kentlerde jiddiy ehwallarda 40 tin artuq yardemchi saqchining tertip saqlaydighanliqini tilgha aldi.

Yerlik saqchixanilardin élin'ghan melumatlar chén chüen'goning nöwette Uyghur diyarida tibette qollan'ghan saqchini köpeytish, tekshürüsh nuqtilirini torlashturush we yerlik ahalilarni kichik guruppilargha ayrip "Qosh qatlamliq" nazaret sistémisi hasil qilishtek bir qatar idare qilish siyasetlirini jiddiy türde sinaq qiliwatqanliqini körsetmekte.

Xoten wilayitining melum yéziliq bashlan'ghuch mektipidiki bir neper amanliq xadimimu bu heqte radiyomiz ziyaritini qobul qilip bezi ehwallarni ashkara qildi. Uning bildürishiche, kent saqchiliri bilen amanliq xadimliri her heptide bir-ikki qétimdin yérim kéchide ahalilarning öylirige bésip kirip tekshüridiken.Egerde sirttin méhman kelse sahibxan choqum kent amanliq nuqtisigha bérip tizimgha aldurushi we kelgen méhmanning pütun uchurini teminlishi lazim iken.

Chén chüen'goning tibetni idare qilish siyasitini Uyghur diyarigha köchürüp kélishi muhajirettiki Uyghur teshkilatliri bilen siyasiy pa'aliyetchilirining diqqitini qozghimaqta.

Bu heqte inkas qayturghan amérika Uyghur birleshmisining re'isi ilshat hesen ependi chén chüen'goning tibette qollan'ghan "Qoshmaq tughqan bolush", "Ahalilerning pasportini yighiwélish" we "Saqchilar bilen bixeterlik tekshürüsh nuqtilirini köpeytish" siyasetlirini Uyghur diyarida sinaq qiliwatqanliqini tekitlidi.

Ilshat hesen yene chén chüen'go tibetni idare qilghan 5 yil jeryanida100din artuq tibetning özini köydürüp öliwélish arqiliq qarshiliq körsetkenlikini, tibette aliqachan meghlub bolghan bu siyasetlerning Uyghur élida uningdinmu éghir aqiwetlerni élip kélishi mumkinlikini ilgiri sürdi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.