Уйғур, моңғуллар токйода хитайға қарши бирләшмә намайиш елип барди

Ихтиярий мухбиримиз һаҗи қутлуқ қадири
2016-10-03
Share
yaponiye-1-oktebir-namayish.jpg Японийәдә паалийәт елип бериватқан уйғур, моңғул кишилик һоқуқ тәшкилатлири елип барған бирләшмә намайишидин көрүнүш. 2016-Йили 1-өктәбир, токйо.
RFA/Qutluq

Японийәдә паалийәт елип бериватқан уйғур, моңғул кишилик һоқуқ тәшкилатлириниң бирләшмә намайиши, 1-өктәбир токйода елип берилди.

1-Өктәбир шәнбә күни шу йәр вақти 1:30 дә уйғур, моңғул вә уларни қоллиғучи японийәлик кишилик һоқуқ паалийәтләр токйодики хитай әлчиханиси алдиға җәм болуп, хитай хәлқ җумһурийити қурулғанлиқиниң 67 йиллиқи мунасивити билән хитайға қарши намайиш елип барди.

Намайишқа һәр қайси милләтләрдин көплигән қоллиғучиларму қатнашти.

Өзигә хас миллийчә кийимләрни кийгән уйғур вә моңғулар токйодики хитай әлчиханиси алдиға топлишип хитайға қарши җараңлиқ авазда түрлүк шоарларни товлап, хитай компартийәсигә болған өзлириниң наразилиқлирини билдүрүшүп өтти.

Японийә уйғур бирлики тәшкилати тәрипидин тәшкилләнгән бу қетимқи бирләшмә намайишқа японийәниң һәр қайси җайлирида яшаватқан уйғур вә моңғул актиплири иштирак қилған болуп, намайишта алди билән җәнубий моңғулийә тәшкилатиниң мәсуллиридин дайчин сөз қилип, хитай компартийәсиниң ички моңғул аптоном елип бериливатқан кишилик һоқуқ дәпсәндичиликини әйиблиди.

Намайишта японийә уйғур бирлики тәшкилатиниң рәиси турмуһәммәт һашим нутуқ сөзләп хитайниң уйғур елидә елип бериватқан диний бастуруш сияситини паш қилди вә тәшкилат намидин баяннамә елан қилди.

Намайиш иштиракчилиридин японийәлик удака әпәндим зияритимизни қобул қилип өз өгиниватқан уйғур тили билән сөз башлап: "намайишқа моңғул, уйғурларниң кишилик һоқуқ мәсилисини қоллаш йүзисидин қатнаштим. Нанамйиш наһайити яхши болди" деди.

Японийә уйғур бирлики тәшкилатиниң актип иштиракчилиридин танака намайиш һәққидә сөз қилип: "намайишқа уйғур,моңғул,тибәт мәсилилирини қоллаш йүзисидин қатнаштим. Әлвәттә, һәммимизниң түп мәқсити хитай компартийәсиниң бу милләтләр үстидин елип бериватқан бастуруш сияситигә қарши туруш" деди.

Мәлум болушичә, бу қетимқи бирләшмә намайиш хитай хәлқ җумһурийити қурулғанлиқиниң 67 йиллиқи мунасивити билән хитай компартийәсиниң уйғур, ички моңғул аптоном районлирида елип барған бастуруш сияситигә қарши японийәдә паалийәт елип бериватқан уйғур вә моңғулларниң бирләшмә намайиши болуп һесаблинидикән.

Намайиш шу йәр вақти чүштин кейин 1:30 дин үч йеримға қәдәр елип берилди.

Намайишниң әмәлий әһвалини японийәдики интернет телевизийә қаналлиридин "сакура" телевизийәси нәқ мәйдандин сүрәткә елип тарқатти.

Бу қетимқи бирләшмә намайишқа японийәниң ибараки, нагоя, сәйтама вә осака қатарлиқ шәһәрләрдин көплигән уйғур вә моңғулар қатнашти.

Юқириқи аваз улинишидин тәпсилатини аңлаң.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт