Илһам тохтиға “түрк дуняси әркинлик мукапати” берилидиғанлиқи униң аилисидикиләрни һаяҗанландурди

Уйғурларниң қануний һәқ - һоқуқлирини тәләп қилғини үчүн, хитай һөкүмити тәрипидин “бөлгүнчилик” билән әйиблинип, түрмигә соланған илһам тохтиға “түрк дуняси әркинлик мукапати” берилидиғанлиқи һәққидики хәвәр униң аилисидикиләрни һаяҗанға салди. Бу илһам әпәндиниң бу йил 3 - айда америка қәләмкәшләр җәмийити тәрипидин берилгән“барбара голдмиш әркин йезиш мукапати”дин кейин иккинчи қетим хәлқара мукапатқа еришиши. Илһам тохтиниң америкида оқуватқан қизи җәвһәр вә бейҗиңдики аяли гүзәлнур зияритимизни қобул қилип, бу хәвәрни аңлиғандин кейинки һаяҗанлиқ кәйпиятини ипадилиди.

2014 - Йили б д т мәдәнийәт, илим - пән вә маарип тәшкилати тәрипидин “исмаил гаспирали йили” елан қилиниш мунасивити билән, түрк дуняси журналистлар җәмийити тәрипидин тәсис қилинған “исмаил гаспирали хәлқаралиқ инсан һәқлири вә журналистлар мукапати”ниң мәшһур уйғур зиялийси илһам тохтиға берилгәнлик хәвири униң аилисидикиләрни һаяҗанға салди.

Илһам тохтиниң аяли гүзәлнур бейҗиңда хитай һөкүмитиниң тәқип қилиши астида туруватқини үчүн, униң америкида оқуватқан қизи җәвһәр түркийигә берип дадиси үчүн берилгән мукапатни тапшурувелишқа тәклип қилинди. Әмма илһам тохтиниң қизи җәвһәр вә аяли гүзәлнурлар түрлүк сәвәбләр түпәйлидин түркийигә берип мурасимға қатнишиш имканийити болмиғини үчүн, радиомиз арқилиқ 300 милйон түрк дунясиға өзлириниң миннәтдарлиқини билдүрди.

Бейҗиңда туғулуп кичикидин хитай тилида маарип тәрбийиси алған җәвһәр раван енгилиз тили вә уйғур тиллирида өз миннәтдарлиқини ипадиләш билән биллә, дадиси илһам тохтиниң уйғурлар үчүн адаләт вә баравәрлик тәләп қилғанлиқини, униң гунаһсиз икәнликини тәкитләп, хитай һөкүмитиниң өз хаталиқини тонуп, дадиси илһам тохтини шәртсиз қоюп бериши керәкликини тәкитлиди.

Мәлум болушичә 1 - ноябир тарқитилидиған “түрк дуняси әркинлик мукапати” ни йәнә, шимали сипрус түрк җумһурийити дөләт башлиқи дәрвиш әроғлу, қирим татарлириниң лидири мустафа җәмил қиримлиоғлу, әзәрбәйҗан парламент әзаси пашайева ханим вә түркийидә тонулған 7 яшлиқ уйғур балиси муҗаһит қәшқәр қатарлиқларғиму бериш қарар қилинған.

Илһам әпәндиниң аяли гүзәлнур бу хәвәрниң өзини қаттиқ һаяҗанландурғанлиқини билдүрүп, “бу йил 3 - айда америка қәләмкәшләр җәмийити илһамға “барбара голдмиш әркин йезиш мукапати” ни бәргән чағдиму аилимиз үчүн байрам болған иди. Илһам түрмидә пут - қолиға кишән селинип қаттиқ азап тартиватқан бу күнләрдә униң дуня хәлқи тәрипидин қәдирлиниши мени чәксиз һаяҗанға салди” деди.

Гүзәлнур ханим сөзини давамлаштуруп, хитай һөкүмити илһам тохтини аталмиш “бөлгүнчилик вә террорлуққа қутратқулуқ қилиш” билән әйибләп түрмигә солиған, аилисини қаттиқ тәқип астиға алған бу еғир бу күнләрдә, илһам әпәндиниң хәлқарада қәдирлиниши вә мукапатқа еришиши адаләт вә һәққанийәтниң йәнила үстүн туридиғанлиқиниң испати икәнликини тәкитлиди.

Һөрмәтлик радио аңлиғучи достлар 1 - ноябир күни түркийиниң бартин вилайитидә мукапат бериш мурасими өткүзүлиду.Радиомизниң түркийидики мухбирлири кейинки нөвәтлик хәвәрлиридә 1 - ноябирдики мурасимниң әмилий әһвали һәққидә давамлиқ мәлумат бериду.