Ghuljidiki "Mélodiye chayxanisi" ning sahibi türmide aghrighan, doxturxanida jan üzgen

Muxbirimiz shöhret hoshur
2018-01-15
Élxet
Pikir
Share
Print
Ghulja shehiridiki "Mélodiye chayxanisi" ning sahibi, tijaretchi yasinjan moydin.
Ghulja shehiridiki "Mélodiye chayxanisi" ning sahibi, tijaretchi yasinjan moydin.
RFA/Shöhret Hoshur

Anglighuchilirimizdin biri ötken yili 12-ayning béshida radiyomizgha mektup yollap, ghulja shehiridiki "Mélodiye chayxanisi" ning sahibi, tijaretchi yasinjan moydinning 6-7 ay awwal saqchilar teripidin tutup kétilgenliki, 11‏-ayning axiri türmidin zembilge sélin'ghan halette a'ilisige qayturulghanliqi we ürümchide dawalinish dawamida saqiyalmay hayatidin ayrilghanliqini melum qildi. Nöwette chet'elde yashawatqan, ghulja weziyiti we yasinjan moydinning ehwalidin xewerdar kishilerdin biri yéqinda muxbirimizning ziyaritini qobul qilip, yasinjan moydinning türmide ölgenliki we uning türmige kirishtin burun saq-salamet béjirim bir kishi ikenlikini ashkarilidi.

Mezkur mektupta déyilishiche, "Mélodiye chayxanisi" ghulja shehirining üchderwazidiki meshrepbay kochisigha jaylashqan. Uning 43 yashliq sahibi yasinjan moydin bultur 4-ayda namelum seweb ‏bilen tutup kétilgen. 11 We 19 yashliq ikki perzentning dadisi bolghan yasinjan moydin türmide 6 ay yatqandin kéyin, éghir késel halette a'ilisige qayturulghan. Nöwette chet'elde yashawatqan, ghulja weziyiti we yasinjan moydinning a'ile ehwalidin xewerdar bir kishi yéqinda téléfon ziyaritimizni qobul qilip, yasinjan moydinning tutulushi we ölümi heqqide bilidighanlirini melum qildi.

Melum bolushiche yasinjan moydin tutqun qilin'ghandin kéyin, ghulja shehiridiki boz türmige apirilghan. Yasinjan moydin téxi tekshürülüwatqan, délo axirlashmighan bir peytte uning salametlikidin éghir derijide mesile körülgen. Kocha xewerliride déyilishiche, yasinjan moydin zembilige sélinip a'ilisige tapshurulghan. Qérindashliri yasinjanni ürümchige apirip jiddiy shekilde dawalatqan bolsimu, qutquzush ünüm bermey hayatidin ayrilghan.

Melum bolushiche, "Mélodiye chayxanisi", yeni téz tamaqxanisini bashquruwatqan yasinjanning ayali merhaba xanim, ilgiriki yillarda türkiyege sayahetke barghanliqi üchün tutulghan we bir qétim "Terbiye" linip yénip chiqqan. Nöwette Uyghur aptonom rayoni weziyitining jiddiyliki, yasinjanning ayali merhabamu guman we nazaret astida bolghanliqi üchün, yasinjanning türmide qandaq késelge giriptar bolghanliqi yaki doxturxanining qandaq di'agnoz qoyghanliqi melum emes. Uning üstige yasinjanning qandaq guman bilen tutulghanliqi, tekshürülüsh basquchida némilerning aydinglashqanliqi yasinjanning a'ile-tawabi'atlirighimu melum emes.

Weziyettin xewerdar kishining bayan qilinishiche, yasinjan türmide qéyin-qistaqtin éghir zeximlen'gen yaki türmidiki adettin tashqiri nachar shara'it tüpeylidin késelge giriptar bolghan bolushi mumkin. U yene yasinjanning salametliki yamanlashqandin kéyin xéli mezgilgiche saqchilarning uninggha perwa qilmighanliqi, dawalimighanliqi, uning hayat qélishidin ümid üzülgendila andin a'ilisige qayturghanliqini ilgiri sürdi.

Toluq bet