Doktor turmuhemmet hashim tyen'enménde yüz bergen weqe toghrisida doklat berdi

3 Neper Uyghur tyen'enmén meydanida mashina soqush weqesi payda qilghandin kéyinki saqchilarning neq meydanni qorshap turghan körünüsh. 2013-Yili 28-öktebir, béyjing.

11-Ayning 2-küni yaponiyening nigata ölkisining naga'oka shehiride ötküzülgen gambaro nippon teshkilatining yighilishida, 28-öktebir tyen'enmén'ge aptomobil bilen hujum qilish weqesi toghrisida doklat bérildi.

Naga'oka shehiride ötküzülgen gambaro teshkilatining bu qétimqi yighilishida asasliqi “Xitayning sénkaku ariligha séliwatqan tehditi we xitayning az sanliq milletlerni basturush siyasiti” dégen témida doklat sözlesh asas qilindi.

Yapon milletchiliridin teshkillen'gen gambaro nippon teshkilatining nigata ölkisidiki tarmaq shöbisining qurulush murasimigha alahide teklip bilen qatnashqan yaponiyediki Uyghur ziyaliysi doktor turmuhemmet hashim “Xitayning Uyghurlarni basturush siyasitidin xitayning mahiyitini körüwalalaymiz” dégen témida doklat berdi.

Doktor turmuhemmet hashim doklatida asasliqi 28-öktebir xitayning tyen'enmén meydanida yüz bergen aptomobil bilen hujum qilish weqesi toghrisida toxtaldi.

Naga'oka shehiride ötküzülgen bu qétimqi pa'aliyetke yaponiye yuqiri palatasining ezasi, yaponiye erkin démokratlar partiyisining mu'awin sékrétari aka iké qatnashti we doklat berdi.

Aka iké doklatida yaponiyening nöwettiki weziyiti, asasiy qanun'gha tüzitish kirgüzüsh jeryanida parlaméntta élip bériliwatqan munaziriler we shundaqla yaponiye bash weziri shinzo abéning tashqi siyasiti toghrisida qisqiche toxtaldi.

Bu qétimqi pa'aliyette gambaro nippon teshkilatining sékrétari, yaponiye sakura téléwiziye istansisining mes'uli mizushima ependimu ishtirak qildi we sénkaku arili mesilisi heqqide muhim söz qildi.

Gambaro nippon teshkilatining nigata ölkisidiki tarmaq shöbisining qurulghanliqini tebriklesh pa'aliyiti naga'oka shehiridiki hökümet binasining yighin zalida ötküzülgen bolup,pa'aliyet chüshtin kéyin sa'et ikkidin beshke qeder dawamlashti, pa'aliyetke naga'oka shehiridiki gambaro nippon teshkilatining barliq ezaliri ishtirak qildi.

Biz mezkur pa'aliyet heqqide toluq melumatqa érishish üchün, dunya Uyghur qurultiyi tetqiqat merkizining mu'awin re'isi doktor turmuhemmet hashim bilen téléfon söhbiti élip barduq.

Awaz ulinishidin tepsilatini anglang.