Учтурпанда қанлиқ тоқунуш йүз берип 11 адәм өлгән, наһийәдә җиддий һаләт җакарланған

Шинхуа ториниң үрүмчидин бәргән хәвиригә қариғанда, бүгүн, йәни 14 - феврал чүштин кейин саәт 16:00дә учтурпанда қанлиқ тоқунуш йүз берип 11адәм өлгән.

Хитай сақчи тәрәпниң ашкарилишичә, аптомобил вә мототсиклетларға партлатқуч буюмларни қачилап, палта - пичақлар билән қоралланған бир топ уйғур яшлар учтурпан наһийәсидә чарлап йүргән сақчи аптомобиллириға һуҗум қилған. Һуҗумда икки нәпәр сақчи билән йәнә икки нәпәр пуқраниң яриланғанлиқи һәмдә 5 данә чарлаш аптомобилиниң зәрбигә учриғанлиқи илгири сурүлмәктә.

Хитай тәрәп һазирғичә бәргән мәлуматқа қариғанда, сақчилар нәқ мәйданда 8 нәпәр уйғур һуҗумчини етип өлтүрүп, бир нәпирини тирик тутқан, йәнә үч нәпәр һуҗумчи өзлири ясиған бомба партлап кетип өлгәнлики мәлум.

Биз хитай һөкүмәт тәрәп тарқатқан учурдин башқа бу һәқтә ениқ мәлумат елиш үчүн учтурпан наһийилик һөкүмәт ишханиси, һәрқайси сақчихана, дохтурхана, банка вә пуқраларниң туралғулириға телефон қилдуқ.

Учтурпан наһийилик һөкүмәт ишханиси телефонимизни қобул қилмиди.

Учтурпан наһийә яркөврүк сақчиханисидин телефонимизни қобул қилған нөвәтчи хадим телефонниң “әркин асия радиоси” мухбиридин кәлгәнликини уққандин кейин соаллиримизға җаваб беришни рәт қилди.

Ачитағ сақчиханисиниң нөвәтчи хадими телефонимизни қобул қилған болсиму, лекин өзиниң ярдәмчи сақчи икәнликини, чәтәл мухбириниң соаллириға җаваб берәлмәйдиғанлиқини билдүрди.

Биз арқидин учтурпан наһийәлик дохтурханиға телефон қилдуқ. Телефонни алған уйғур дохтур вәқә һәққидә мәлумат беришни рәт қилған болсиму, лекин бир қисим әһвалларни сөзләп бәрди.

Биз вәқә һәққидә йәниму чоңқурлап учурға еришиш үчүн учтурпан шәһәр ичидә олтурушлуқ бир уйғур аилисигә телефон қилдуқ.

Биз ахирида учтурпан наһийәлик тәминат қәрз копиратипиға телефон қилдуқ. Телефонни қобул қилған нөвәтчи хадим бир қисим соаллиримизға еһтиятчанлиқ билән җаваб бәрди.

Тәпсилатини аваз улиништин аңлиғайсиз.