Uchturpanning weqe yüz bergen imamlirim yézisidiki xitay köchmenliri ige bolghan ewzellikler

9-Iyul küni uchturpanning imamlirim yézisida yüz bergen 4 a'ililik xitay yer xojayinlirining öltürülüsh weqesi heqqide muxbirimizning ehwal éniqlashliri dawamida mezkur yézidiki xitay köchmenliri bilen Uyghur ahalilerning shert-shara'it perqliri ashkarilandi.

Melum bolushiche, imamlirimdiki xitay köchmenliri ilikidiki térilghu yerge bazarning éhtiyajigha qarap özliri xalighan zira'etni térish hoquqigha ige, emma Uyghur déhqanliri hökümet belgilep bergen zira'etnila térishi shert. Uyghur déhqanliri yilda az dégende 60 kün hashargha ishleshke mejbur؛ emma xitay köchmenlirining mundaq bir mejburiyiti yoq. Kent nopusining 3% ini igileydighan xitay köchmenliri kent térilghu yerlirining az kem yérimigha sahib, buning üstige sughurush nöwiti aldi bilen shulargha mensup؛ Uyghur déhqanliri cheklik yerlirini xitay köchmenliridin ashqan su bilen sughurushtin bashqigha charisiz.

Her ikkisi xitay puqrasi dep tonulghan, her ikkisi déhqan dep atalghan, uning üstige ikkisi arisida yillardin béri milletler ittipaqliqi terbiyisi toxtimay élip bériliwatqan Uyghur déhqanliri bilen xitay déhqanliri uchturpanning imamlirim yézisida qandaq perqliq imkanlargha ige?

Awazini ashkarilashni xalimighan bir déhqanning bayan qilishiche, nöwette uchturpanda yer tériwatqan xitay köchmenliri, mahiyette déhqan emes؛ ular xojayin, ular puldar, ular hoquqdar. Chünki ular xalighan waqitta, xalighan miqdarda bankidin pul alalaydu, xalighan waqtida saqchilarni chaqirtip ekélip özliri bilen jédelleshken Uyghurlarni tutquzuwételeydu. Yene bu déhqanning hejwiy shekilde bayan qilishiche, uchturpanda Uyghurlar bilen xitaylar arisida inaq jem'iyet berpa bolush üchün, barliq Uyghurlar közi körmeydighan, quliqi anglimaydighan, yaki körgen-anglighanliri üstidin tepekkur qilalmaydighan bolushi kérek.

Yuqiridiki awaz ulinishidin, muxbirimizning shu yéza xadimliri we déhqanlar bilen ötküzgen söhbitini anglaysiler.