D u q rehberliri “Milliy görüsh” teshkilati bilen körüshti

Dunya Uyghur qurultiyining rehberliri “Milliy görüsh” teshkilatining bash shitabini ziyaret qilip, Uyghurlar mesilisi üstide söhbetler élip bardi.

12-Féwral küni d u q rehberliri muhajirettiki türk jama'itining dunyaning her yerliride qanche yüz ming ezasi bolghan “Milliy görüsh” teshkilatining teklipi bilen ularning bash shitabini ziyaret qilip, Uyghur diyarining nöwettiki weziyiti we bundin kéyin xitaygha qarshi hemkarliship élip baridighan pa'aliyetler toghrisida söhbetlerde boldi.

Merkizi gérmaniyening köln shehiride bolghan “Milliy görüsh” teshkilati bu yil 2-féwraldin bashlap 11-féwralghiche yawropa, shimaliy amérika, awstraliye qatarliq qit'elerdiki 16 din artuq dölet, 20 din artuq chong sheherlerde hem türkiyede xitayning Uyghurlar üstidin yürgüzüwatqan zulumlirigha, bolupmu jaza lagérlirigha qarshi d u q bilen hemkarliship, kölimi zor namayishlarni élip barghan idi.

Igilishimizche, “Milliy görüsh” teshkilati nöwette xitaygha bolghan qarshiliqni dunya miqyasida yenimu bir baldaq yuqiri dolqun'gha kötürüsh üchün d u q re'isi dolqun eysa bashliq qurultay rehberlirini jiddiy körüshüshke teklip qilghan. Dolqun eysa ependi amérikida, qurultayning bashqa rehberliri yene bashqa döletlerde türlük siyasiy pa'aliyetler bilen aldirash bolghanliqi seweblik qurultayning mu'awin re'isi perhat muhemmidi we qurultay fondining mes'uli abdujélil emet ependiler 12-féwral seher myunxéndin yolgha chiqip, chüshtin kéyin sa'et 14:00 bilen köln shehirige yétip barghan we d u q gha wakaliten bu uchrishishqa qatnashqan.

D u q rehberliri söhbettin ilgiri qurultay re'isi dolqun eysa ependining türkiye tashqi ishlar ministirliqining 9-féwral küni élan qilghan jaza lagérlirigha qarshi bayanatigha qurultaygha wakaliten rehmitini bildürüp yazghan mexsus xétini hemde d u q teripidin Uyghur diyaridiki jaza lagérlirigha munasiwetlik türkche hazirlan'ghan doklatini “Milliy görüsh” teshkilatining rehberlirige teqdim qilghan. Shuning bilen birge “Milliy görüsh” teshkilatining Uyghurlarning paji'elik teqdirige köngül bölüp, xitayning insaniyetke qarshi zorawanliqlirigha nisbeten dunyaning herqaysi jaylirida namayishlar teshkillep, Uyghur millitining yalghuz emeslikini alemge jakarlighanliqigha teshekkürlirini izhar qilghan. Ikki terep otturisidiki söhbet 2 sa'et dawam qilghan.

Köln shehiridin ziyaritimizni qobul qilghan d u q ning mu'awin re'isi perhat muhemmidi ependi bu qétimqi uchrishishta keng da'iride muzakiriler élip bérilghanliqini, bolupmu aldimizdiki aylarda xitay hakimiyitini xelq'arada téximu reswa qilish, jaza lagérlirini taqashqa mejburlar üchün qandaq yéngiche chare-tedbirlerge muraji'et qilish lazimliqini nuqtiliq muzakire qilghanliqini tilgha aldi we qilmaqchi bolghan bezi pa'aliyetler toghrisida aldin melumat bérelmeydighanliqini bildürdi.

D u q fondining mudiri abdujélil emet ependi bu qétimqi uchrishish heqqide toxtalghanda “Milliy görüsh” teshkilatining maddiy we meniwi tereplerdin “Sherqiy türkistan dewasini ebediy qollaydighanliqi” ni bildürgenlikini, xitayning jaza lagérlirigha qarshi Uyghurlar bilen her waqit bir septe turidighanliqini ipade qilghanliqini alahide eskertti.

Melum bolushiche, ötken yilining axirliridin étibaren yawropadiki türk teshkilatliri arisida xitayning Uyghur diyaridiki jaza lagérliri siyasiti we türlük zulumlirigha qarita türkiye hökümitining dawamliq sükütte turuwélishigha nisbeten küchlük naraziliq peyda bolghan. Uyghurlargha qérindash we dindash bolghan türk milliti özlükidin 2018-yili 12-aydin bashlap d u q bilen hemkarliship yawropa döletliride xitaygha qarshi tushmutushtin qozghilip chiqishqa bashlighan. Hazir d u q bilen hemkarliship xitaygha qarshi heriket qilish arzusida boluwatqan muhajirettiki türk teshkilatlirining sani barghanséri köpiyiwatqan bolup, hetta yawropadiki bezi ereb islamiy guruppilarmu pütün dunya miqyasida jaza lagérliri toghrisida ortaq qarshiliq sadaliri chiqirish üchün d u q ning orunlashturushini kütmekte iken.