Ақсу вилайәтлик мәркизий тутуп туруш орни турсунҗан мәмәт маршал һәққидә учур беришни рәт қилди

Мухбиримиз қутлан
2016.06.15
Share on WhatsApp
Share on WhatsApp
Tursunjan-Memet-misranim-4.jpg Турсунҗан мәмәт маршалниң язғучи өмәрҗан һәсән бозқир билән өткүзгән сөһбәт хатириси вә униң тор нусхисиниң муқависи.
RFA/Qutlan

Игилишимизчә, ақсу вилайәтлик дөләт хәвпсизлики идариси “мисраним” ториниң башқурғучиси, актип тор язари турсунҗан мәмәт маршалниң делоси һәққидики тәкшүрүшни ахирлаштуруп, уни ақсу вилайәтлик мәркизий тутуп туруш орниға өткүзүп бәргәнлики мәлум. Әмма униң қачан сотлинидиғанлиқи һәққидә һазирчә мәлумат йоқ.

Бу йил 59 яшқа киргән мәмәт қарим тутуп кетилгинигә икки йерим ай болған оғли турсунҗан мәмәт маршал һәққидә радийомиз зияритини қобул қилди.

У оғли турсунҗанниң делосини алди билән ақсу вилайәтлик дөләт хәвпсизлики идарисиниң муавин башлиқи туйғунниң мәсул болуп тәкшүргәнликини, һазир дәсләпки тәкшүрүшниң ахирлишип, оғли турсунҗанниң ақсу вилайәтлик мәркизий тутуп туруш орниға өткүзүп берилгәнликини билдүрди.

Мәмәт қарим ақсу вилайәтлик дөләт хәвпсизлик идарисиниң муавин башлиқи туйғунниң оғли турсунҗан һәққидики әйибнамини өзигә оқуп бәргәнликини, лекин өзиниң әйибнамигә имза қоймиғанлиқини шу сәвәбтин туйғунниң өзигә тәһдит арилаш бесим ишләткәнликини тилға алди.

Мәмәт қарим йәнә аялиниң оғли сәвәблик ағрип дохтурханиға кирип қалғанлиқини, юқири қан бесими, йүрәк кесили вә диабет кесәллики қошулуп саламәтликиниң пүтүнләй яманлашқанлиқини, ахирқи күнлири қалған аниниң оғли билән телефонда болсиму сөзлишивелишини қолға кәлтүрүш үчүн ақсудики тутуп туруш орниға телефон қилғинида рәһимсизлик билән рәт қилинғанлиқини илгири сүрди.

Мәмәт қарим оғли турсунҗан үчүн 15 миң сом пул төләп үрүмчи хәлқара чоң базар қешидики адвокатлиқ орниниң адвокати абдурешит миҗитни адвокатлиққа чақирғанлиқини, һалбуки, адвокатниң һазирға қәдәр мәзкур дело һәққидә уларға ениқ учур берәлмигәнликини тәкитлиди.

Биз адвокат абдурешит миҗитқа телефон қилғинимизда, у телефонниң чәтәл мухбиридин кәлгәнликини уқуп соаллиримизға җаваб беришни рәт қилди.

5-Айниң 31-күни мәмәт қарим ақсуға берип ақсу вилайәтлик мәркизий тутуп туруш орниниң муавин башлиқи мухтәр билән көришиду. У гәрчә мәмәт қарим оғлиға үчүн елип кәлгән кийим-кечәк, йемәк-ичмәк вә 300 сом пулни қобул қилған болсиму, лекин униң оғли билән көрүшүвелиш тәлипини рәт қилиду.

Биз бу учурға асасән ақсу вилайәтлик мәркизий тутуп туруш орниниң муавин башлиқи мухтәргә телефон қилдуқ. У телефонимизни қобул қилған болсиму, лекин турсунҗанниң әһвали тоғрисида еғиз ечиштин өзини қачурди.

Мәмәт қарим ахирида оғли турсунҗан мәмәт маршалниң ақсуда тутқун қилинған өмәрҗан һәсән бозқир вә үрүмчидә тутқун қилинған маарип саһәсидә хизмәт қилған 50 яшлардики йәнә бир тор язғучиси билән биллә “мисраним” ториға мунасивәтлик бир сиясий делоға четилғанлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт